काठमाडौं । सेयर बजार दोहोरो अंकको गिरावट आएको छ । ४ दिनपछि खुलेको बजार १९ अंकले घटेर बन्द भएको हो ।
सूचकसँगै कारोबार रकममा पनि गिरावट आएको छ । तिहार अघि दैनिक औसतमा ६ अर्ब बढीको कारोबार हुँदै आएकोमा आज घटेर साढे ४ अर्बमा सीमित भएको छ ।
सेयर बजार मापक सूचक नेप्से १९.२० अंकले घटेरर २८२९.६५ विन्दुमा आइपुगेको छ । यसदिन २३० कम्पनीको ४ अर्ब ४२ करोड ७ लाख १९ हजार १०३ रुपैयाँ बढीको ७२ लाख ७ हजार ३९६ कित्ता सेयर किनबेच भएका छन् ।
आज कारोबारमा आएका १३ वटा समूहमध्ये १० समूहको परिसूचकमा राताम्मे भएको छ भने ३ समूहको परिसूचकमा हरियाली छाएको छ । अन्य समूह सबैभन्दा धेरै १.१६ प्रतिशतले घटेको छ भने फाइनानस समूह ०.७८ प्रतिशतले बढेको छ ।
कारोबारमा आएका २३० कम्पनीमध्ये ५७ कम्पनीको सेयर मूल्य बढेको छ भने १६४ कम्पनीको मूल्य घटेको छ । ९ कम्पनीको मूल्य स्थिर रहेको छ ।
आज महालक्ष्मी विकास बैंकको सर्वाधिक कारोबार भएको छ । यसको ५२ करोड रुपैयाँको कारोबार भएको छ । यस्तै, नबिल बैंकको २२ करोड र आइसीएफसी फाइनान्स २२ करोड बढीको कारोबार हुँदै सर्वाधिक कारोबार हुने कम्पनीको शीर्ष तीनमा रहे ।
दोहोरो अंकले घटेको बजारमा आज ५ कम्पनीको सेयर मूल्यमा पोजेटिभ सर्किट लागेको छ । साहस ऊर्जा र आइसीएफी फाइनान्सका सेयरधनीले ठ्याक्कै १० प्रतिशत कमाएका छन् ।
यसैगरी, महालक्ष्मी विकास बैंक, मानुषी लघुवित्त र तेह्रथुम पावर कम्पनीका सेयरधनीले पनि करिब १० प्रतिशत कमाएका छन् । घट्दो बजारमा आज सपोर्ट माइक्रोफाइनान्सका सेयरधनीले सबैभन्दा धेरै ७.९६ प्रतिशत गुमाएका छन् ।
