काठमाडौं । राष्ट्रिय गौरवको आयोजना फास्ट ट्रयाक (द्रुत मार्ग)मा बन्ने सुरुङको डिजाइन मंसिरभित्र सम्पन्न हुने भएको छ । ५ महिना अघि नेपाल आएको चिनियाँ प्रविधिक जनशक्तिले बनाइरहेको सुरुङमार्गको डिजाइन अन्तिम चरणमा पुगेको नेपाल सेनाले जनाएको छ ।
नेपाली सेनाका प्रवक्ता सन्तोषबल्लभ पौडेलले मंसिर मसान्त भित्र डिजाइन सकिने गरी काम भइरहेको बताए । उनले हाल साइड क्याम्प, फिल्ड सर्भे, जियो टेक्नोलोजी डिजाइन, प्रिलीमिनेरी डिजाइन लगायतका कामहरू समेत भइरहेको बताए ।
‘यही मंसिर मसान्तभित्र सुरुङको डिजाइन सकिने गरी चिनियाँ टोलीले काम गरिरहेको छ, यही आर्थिक वर्षभित्र निर्माण सुरु गर्ने छौँ,’ पौडेलले चाणक्य पोष्टसँग भने ।
नेपाली सेनाको व्यवस्थापनमा निर्माणाधीन काठमाडौं–तराई–मधेश द्रुतमार्गमा ३ वटा सुरुङमार्गको डिजाइन निर्माणका दुई चिनियाँ कम्पनीले ठेक्का पाएका थिए । ठेक्का पाएका कम्पनीका प्रावधिक जनशक्ति सुरुङ मार्गको स्थलगत अध्ययन र डिजाइनका लागि गत असारमा नेपाल आएको थिए । सो टोलीले हाल सुरुङमार्गको डिजाइनको काम गरिरहेको छ ।
पहिलो प्याकेजअन्तर्गतको सुरुङ तथा पुल निर्माणका लागि चाइना स्टेट इन्जिनियरिङ कर्पोरेसनले ठेक्का पाएको छ । दोस्रो प्याकेज अन्तर्गतको सुरुङ तथा पुल निर्माण गर्न पोली चङ्दा ग्रुपको पोली चङ्डा इन्जिनीयरिङसँग गत वैशाखमा सम्झौता भएको थियो ।
सेनाका अनुसार पहिलो प्याकेजको ठेक्का सम्झौता रकम २१ अर्ब ६१ करोड रुपैयाँ छ । दोस्रो प्याकेजको सम्झौता रकम २८ अर्ब ५३ करोड रुपैयाँ छ ।
टोलीले कार्यालय स्थापना गरी डिजाइनको कामलाई तीव्रता दिएको छ । चिनियाँ कम्पनीसँग टनेलको डिजाइ निर्माणका लागि ६ महिना समय पाएका थिए । टनेल निर्माणमा ढिलाइ नहोस भनेर चिनियाँ कम्पनीले मोबीलाइजेसन अघिनै काम सुरु गरेका थिए ।
चिनियाँ कम्पनीले फाइल इन्जिनीयरिङ प्रोक्यूमेन्ट कन्ट्रयाक्ट (ईपीसी) मोडलमा टनेल बनाउन लागेको हो । यस अन्तर्गत प्लानिङ, डिजाइन, इन्जिनेरिङ, प्रोक्यूमेन्ट, कन्स्ट्रक्सन तथा कम्माइनिङ सबै काम गर्नु पर्ने छ ।
फास्ट ट्रयाक अन्तर्गत ३ वटा टनेल बन्ने छ । चिनियाँ कम्पनीले कुल ७२.५ किलोमिटर लम्बाइ सडकखण्ड मध्ये (३ वटा सुरुङमार्ग ६.४१ किमी र पुलहरूको लम्बाई १०.५९ किमी) बाहेका ५५.५ किलोमिटर सडक खण्ड निर्माण गर्नुपर्ने हुन्छ ।
धेद्रे महादेवटार तर्फ एउटा लामो टनेल बन्ने छ । लेनडाँडा तर्फ २ वटा टनेल बन्ने छन् । टनेलका साथै ब्रीज र सडक समेत निर्माण गर्नु पर्ने छ । धेद्रे महादेवटार तर्फ टनेल लगतै लामो ब्रिज निर्माण गर्नु पर्ने छ भने त्यस लगतै केही मिटर सडक पछि फेरि अर्को ब्रिज रहेकाले यी सबै निर्माण चिनियाँ कम्पनी आफैले गर्नुपर्ने प्रवक्ता पौडेलले बताए ।
