काठमाडौं । सेयर बजारमा दोहोरो अंकको कमब्याक भएको छ । पछिल्ला दुई दिन लगातार दोहोरो अंकले घटेको नेप्से आज दोहोरो अंकले नै उकालो लागेको हो ।
सूचकमा सुधार आए पनि कारोबार रकममा भने भारी गिरावट आएको छ । अघिल्लोे दिनको तुलनामा कारोबार रकम करिब २ अर्बले घटेर ४ अर्बमा सीमित भएको छ ।
आज सेयर बजार मापक सूचक नेप्से २७.४१ अंकले बढेर २६४५.८४ विन्दुमा पुगेको छ । नेपाल स्टक एक्सचेन्जका अनुसार आज २१८ कम्पनीको ४ अर्ब २० करोड ३८ लाख ३२ हजार ७८९ रुपैयाँ बराबरको ७५ लाख ७९ हजार ३ कित्ता सेयर किनबेच भएका छन् ।
सोमबार कारोबारमा आएका १३ वटै समूहको परिसूचकमा हरियाली छाएको छ । निर्जीवन बीमा समूह सबैभन्दा धेरै ३४६.०३ अंकले बढेको छ ।
कारोबारमा आएका २१८ कम्पनीमध्ये १५७ कम्पनीको सेयर मूल्य बढेको छ भने ३० कम्पनीको घटेको छ । ३२ कम्पनीको मूल्य स्थिर रहेको छ ।
आज नेपाल पुनर्बीमा कम्पनीको सर्वाधिक कारोबार भएको छ । यसको २७ करोड ४ लाख रुपैयाँ बढीको कारोबार भएको छ । कारोबार रकमकै आधारमा अपर तामाकोशी १९ करोड र एचआइडीसीएल १८ करोडको कारोबार सहित शीर्ष तीनमा रहे ।
दोहोरो अंकले बढेको बजारमा आज ३ कम्पनीको सेयर मूल्यमा पोजेटिभ सर्किट लागेको छ । राष्टिय बीमा कम्पनीको सेयर मूल्य ठ्याक्कै १० प्रतिशतले बढेको छ भने समता घरेलु लघुवित्त र रुरु जलविद्युत्को सेयर मूल्य १० प्रतिशत कमाएका छन् ।
यसैगरी, आज गुह्वेश्वरी मर्चेन्ट ६.७५ प्रतिशत, लिबर्टी इनर्जी ५.१४ प्रतिशत र पुनर्बीमा कम्पनीका सेयरधनीले ४.९१ प्रतिशत कमाएका छन् ।
बढ्दो बजारमा आज विशाल बजार कम्पनीको मूल्यमा नेगेटिभ सर्किट लागेको छ । यसका लगानीकर्ताले करिब १० प्रतिशत गुमाएका छन् ।
