काठमाडौं । महिला लघुवित्त वित्तीय संस्था नेप्सेमा सूचीकृत लघुवित्तमध्ये सबैभन्दा महँगो सेयर मूल्य भएको लघुवित्त बनेको छ ।
३५ कारोबार दिनदेखि लगातार पोजेटिभ सर्किट अर्थात् १० प्रतिशतले बढेर ५००० नाघेसँगै सबैभन्दा महँगो सेयर मूल्य हुने लघुवित्त कम्पनी बनेको हो । बिहीबार महिलाको सेयर मूल्य प्रतिकित्ता ५०३० रुपैयाँ पुगेको छ ।
यसअघि जनउत्थान लघुवित्त सबैभन्दा महँगो सेयर मूल्य भएको लघुवित्त थियो । तर, जनउत्थानले गत आर्थिक वर्षको नाफाबाट ५० प्रतिशत लाभांश वितरणका लागि मूल्य समायोजन गरेपछि महिला सबैभन्दा महँगो लघुवित्त बनेको हो । यसअघि जनउत्थानको सेयर मूल्य प्रतिकित्ता ५५०० रुपैयाँसम्म पुगेको थियो ।
महिला लघुवित्तको सेयरमा लगानी गरेको डेढ महिनामै लगानीकर्ताले ५० गुणा प्रतिफल हात पारेका छन् । गत चैत ३ गतेदेखि दोस्रो बजारमा कारोबारमा आएको लघुवित्तको सेयर मूल्य ३५ कारोबार दिनसम्म लगातार पोजेटिभ सर्किट लगानीको ५० गुणा भएको छ ।
कम्पनीको आइपीओमा १ हजार लगानी गरेकाहरुको आज सम्पत्ति ५० हजार रुपैयाँ नाघेको छ अर्थात् प्रतिकित्ता १०० रुपैयाँको सेयरको भाउ बढेर ५ हजार पुगेको छ । १० कित्ता आइपीओ पाउनेहरु १ हजार लगानी गरेर ५० हजारको मालिक भएका छन् ।
४३८ रुपैयाँमा पहिलो कारोबार शुरु भएको कम्पनीको सेयर मूल्य लगातार दैनिक १० प्रतिशतले बढेर आज ५०३० रुपैयाँ पुगेको छ । महिलाको सेयरको मूल्य छोइनसक्नु भए पनि अझै खरिका लागि उच्च माग हुँदा सप्लाई भने अत्यन्त न्यून छ । जसले अझे केही दिन सेयरको भाउ बढ्ने संकेत देखिन्छ ।
अहिले पनि हरेक दिन खरिदकर्ताको उच्च चाप रहे पनि विक्रीकर्ता अत्यन्त न्यून हुँदा चाहे जति सेयर किन्न पाउने अवस्था छैन । डेढ महिनाको अवधिमा कम्पनीको जम्मा करिब ३० हजार कित्ता मात्र कारोबार भएको छ ।
लघुवित्तले गत माघ २८ गतेदेखि प्रतिकित्ता १०० रुपैयाँ दरले ४ करोड रुपैयाँ बराबरको ४ लाख कित्ता आइपीओ विक्रीमा ल्याएको थियो । जसमा गोलाप्रथाबाट भाग्यमानी ३७ हजार ५०० जनाले १० कित्ताका दरले सेयर हात पारेका थिए ।
नेप्सेमा लघुवित्तको सर्वसाधरण तर्फको जम्मा ४ लाख कित्ता सेयर सूचीकृत छ । सर्वसाधरणको सेयर संख्या कम भएको र वित्तीय अवस्था पनि बलियो रहेकाले लघुवित्तको सेयरमा आकर्षण देखिएको हो ।
चालू आवको तेस्रो त्रैमाससम्म १० करोड चुक्ता पुँजी रहेको लघुवित्तको जगेडा कोष १९ करोड १८ लाख रुपैयाँको छ। कम्पनीले चैत मसान्तसम्म ६ करोड ४२ लाख खुद नाफा कमाएको छ। कम्पनीको प्रतिसेयर आम्दानी ८५.६६ रुपैयाँ छ।
