काठमाडौं २५ चैत । अजोड इन्स्योरेन्सले पूँजी वद्धिका लागि ५० प्रतिशत हकप्रद सेयर जारी गर्ने प्रस्ताव स्थगित गरेको छ ।१ हप्ता अघिको आफ्नै निर्णय उल्ट्याउँदै अजोडले हकप्रद जारी नगर्ने जानकारी गराएको हो ।
कम्पनीको बुधबार बसेको सञ्चालक समितिको आकस्मिक बैठकले बीमा समितिको निर्देशन अनुसार हकप्रद जारी गर्ने विशेष प्रस्ताव स्थगित गर्ने निर्णय गरेको हो ।
बीमा समितिको यही चैत २३ गतेको पत्रानुसार कम्पनीले प्रस्ताव गरेको पूँजी वृद्धि र हकप्रद जारी गर्ने निर्णय स्थगित गरिएको कम्पनीले जनाएको छ ।
अजोड इन्स्योरेन्सको यही चैत १६ गते बसेको सञ्चालक समितिको बैठकले हाल कायम रहेको चुक्ता पूँजीको ५० प्रतिशत हकप्रद जारी गर्ने निर्णय गरेको थियो ।
हकप्रद निष्काशनको सूचना आउनु अघिल्लो दिन भित्री कम्पनीको सेयरमूल्य १० प्रतिशत बढेको थियो । अस्वभाविक रुपले कम्पनीको सेयरमूल्य बढेपछि अजोडमाथि भित्री सूचना चुहाएको आरोप लाग्दै आएको छ।सो बारे धितोपत्र बोर्डले छानबिन समेत गरिरहेको छ ।
