काठमाडौं । नेपाल स्टक एक्सचेञ्ज (नेप्से) नेपाल इन्फ्रास्ट्रक्चर बैंक (निफ्रा) र चन्दागिरी हिल्सको कारोबार समूह हेरफेर गरेको छ ।
आइतबारदेखि लागू हुने गरी नेप्सेले यसअघि अन्य समूहमा रहेको निफ्रालाई लगानी समूहमा राखेको छ । यसैगरी, यसअघि अन्य समूहमा रहेको चन्द्रागिरी हिल्सलाई होटल तथा पर्यटन समूहमा राखेको छ ।
नेप्सेका अनुसार फागुन ७ गते नेप्सेको व्यवस्थापनले गरेको निर्णय अनुसार आइतबारदेखि लागू हुने गरी केही सूचीकृत कम्पनीको समूह विभाजनमा हेरफेर तथा नयाँ समूहको व्यवस्था गरिएको हो ।
नेप्सेले ‘लगानी’ नामक नयाँ समूह थपेको छ भने होटल समूहको नाम परिवर्तन गरी होटल तथा पर्यटन बनाएको छ । नेप्सेका अनुसार अब लगानी समूहमा यसअघि अन्य समूहमा रहेका नागरिक लगानी कोष, हाइड्रो इलेक्ट्रीसिटी इन्भेष्टमेण्ट एण्ड डेभलपमेण्ट कम्पनी लिमिटेड, निफ्रा र एनआरएन इन्फ्रास्ट्रक्चर एण्ड डेभलपमेण्ट कम्पनीलाई राखिएको छ ।
यसैगरी, चन्द्रागिरी हिल्स सहित यसअघि होटल समूहमा रहेका ओरियण्टल होटल, तारागाउँ रिजेन्सी होटल र याक एण्ड यति होटल होटल तथा पर्यटन समूहमा कारोबार हुने भएको छ ।
यसअघि नेप्सेमा ११ समूहगत परिसूचक रहेकोमा अब लगानी समूह थप गरी १२ वटा समूहका समूहगत परिसूचक कायम गरिएको छ । आइतबारदेखि समूहगत १२ परिसूचकसँगै म्युचुअल फण्ड, नेप्से परिसूचक, नेप्से फ्लोट, सेन्सेटिभ इन्डेक्स र सेन्सेटिभ फ्लोट गरी १७ परिसूचक गणना गर्न लागिएको हो ।
