काठमाडौं । सेयर बजारमा दोहोरो अंकको करेक्शन आएको छ । यससाता पछिल्ला दुई दिन लगातार नयाँ रेकर्ड कायम गरेको बजारमा आज दोहोरो अंकको गिरावट आएको हो ।
सूचकसँगै कारोबार रकममा पनि ठूलो गिरावट आएको छ । अघिल्लो दिनको तुलनामा कारोबार रकम करिब साढे २ अर्बले घटेको छ ।
प्रफिट बुक गर्ने हाबी हुँदा कारोबार रकममा गिरावट आएको लगानीकताको आँकलन छ । यस्तै, बुल ट्रेन्डमा रहेको बजारमा करेक्शन आउँदा सेयर बेच्ने कम हुँदा पनि कारोबार रकम घटेको हो ।
यस्तै, आज दिउँसो करिब आधा घण्टा नेप्सेको टीएमएस सिस्टममा समस्या आउँदा पनि कारोबार रकम घट्न पुगेको हो । बजार करेक्शन हुँदा कारोबार पनि घट्नु स्वभाविक नै रहेको लगानीकर्ताहरुको भनाइ छ ।
आज सेयर बजार मापक सूचक नेप्से २९।०१ अंकले घटेर २५३२.४६ विन्दुमा आइपुगेको छ । नेपाल स्टक एक्सचेन्जका अनुसार आज १९२ कम्पनीको ८ अर्ब १४ करोड ६२ लाख ६९ हजार १९३ रुपैयाँ बराबरको १ करोड ५९ हजार ८५ हजार १९८ कित्ता सेयर किनबेच भएका छन् ।
सोमबार कारोबारमा आएका १२ वटा समूहमध्ये विकास बैंक र फाइनान्स बाहेक अन्य सबै समूहको परिसूचक राताम्मे भएका छन् । जीवन बीमा समूहको परिसूचक सबैभन्दा धेरै २७४.०३ अंकले घटेको छ भने विकास बैंक २५.५२ अंकले बढेको छ ।
कारोबारमा आएका १९२ कम्पनीमध्ये जम्मा ४४ कम्पनीको सेयर मूल्य बढेको छ भने १३५ कम्पनीको मूल्यमा गिरावट आएको छ । १५ कम्पनीको मूल्य स्थिर रहेको छ ।
आज लगानीकर्ताको रोजाइमा ग्रामीण विकास लघुवित्त परेको छ । यसको सबैभन्दा धेरै २८ करोड २३ लाख रुपैयाँ बढीको कारोबार भएको छ । कारोबार रकमकै प्रभु बैंक २४ करोड र ग्लोबल आइएमई बैंक १९ करोडसहित शीर्ष तीनमा रहे ।
दोहोरो अंकले घटेको बजारमा पनि आज ४ कम्पनीको सेयर मूल्यमा पोजेटिभ सर्किट लागेको छ । गुडविल फाइनान्स, श्री इन्भेष्टमेन्ट फाइनान्स,समृद्धि फाइनान्स र लुम्बिनी विकास बैंकका सेयरधनीले करिब १० प्रतिशत कमाएका छन् ।
घट्दो बजारमा आज सपोर्ट माइक्रोफाइनान्सका सेयरधनीले सबैभन्दा धेरै ५.८२ प्रतिशत गुमाएका छन् ।
