काठमाडौं । नेरुडे लघुवित्त वित्तीय संस्थाको संस्थापक समूहको (प्रमोटर) सेयर आजदेखि लिलामीमा आएको छ ।
प्राइम कमर्शियल बैंकले आफ्नो स्वामित्वमा रहेको ५२ हजार ७५० कित्ता संस्थापक सेयर लिलामी मार्फत विक्री गर्न लागेको हो ।
बैंकले आफ्नो स्वामित्वमा रहेको १ लाख १० हजार कित्ता संस्थापक सेयर २०७६ असार १० गतेदेखि विक्रीमा ल्याएको थियो । त्यसमध्ये २२ हजार ७०० कित्ता सेयर मात्र विक्री भएको थियो ।
सो बेला बाँकी रहेको ८७ हजार ३०० कित्ता २०७७ मंसिर १८ गतेदेखि लिलामीमा ल्याएको भए पनि ३४ हजार १५० कित्ता मात्र विक्री भएको थियो । सो बाँकी रहेको ५२ हजार ७५० कित्ता बैंकले अहिले फेरि लिलामीमा ल्याएको हो ।
कम्पनीको सेयर किन्न इच्छुक लगानीकर्ताले न्यूनतम मूल्य प्रतिकित्ता ३०० रुपैयाँ नघटाई आफूले लिन चाहेको सेयर संख्य मूल्य तोकी गोप्य शिलबन्दी मार्फत आवेदन दिनु पर्नेछ ।
कम्पनीको लिलामी सेयरमा पुस २३ गतेसम्म शिलबन्दी बोलपत्र पेश गर्न सकिनेछ । आवेदकले न्यूनतम १०० कित्तादेखि अधिकतम सबै कित्ताका लागि आवेदन दिन सक्नेछन् ।
लिलामी सेयरमा विद्यमान संस्थापक सेयरधनीसहित अन्य इच्छुक व्यक्ति, फर्म कम्पनी तथा संगठित संस्थाहरुले आवेदन दिन सक्नेछन् ।
इच्छुक लगानीकर्ताले सनराइज क्यापिटल, प्राइम कमर्शियल बैंकका शाखा कार्यालय मार्फत आवेदन दिन सक्नेछन् ।बोलपत्र पुस २६ गते दिउँसो १ बजे खुला गरिने क्यापिटलले जनाएको छ ।
