काठमाडौं । सेयर लगानीकर्ताले आज एकैदिन करिब पौने २ खर्ब सम्पत्ति गुमाएका छन् ।
राष्ट्र बैंकले सेयर कर्जामा कडाइ गर्ने बताएसँगै हतोत्साही बनेका लगानीकर्ताको मनोबल गिर्दा नेप्से एकैदिन १२३ अंकले घटेको छ भने लगानीकर्ताको सम्पत्ति एकैदिन १ खर्ब ६५ अर्ब ३२ करोडले गुमेको छ ।
गत बिहीबार २७ खर्ब ५५ अर्ब ६ करोड रुपैयाँ पुगेको बजार पूँजीकरण आइतबार घटेर २५ खर्ब ८९ अर्ब ७४ करोड रुपैयाँमा आएको छ ।
नेपाल राष्ट्र बैंकले बिहीबार चालू आर्थिक वर्षको मौद्रिक नीति समीक्षा गर्दै सेयर कर्जामा कडाइ गर्ने जनाएसँगै त्यसको प्रत्यक्ष असर सेयर बजारमा देखिएको हो । राष्ट्र बैंकले सेयर धितो कर्जाको सीमामा पुनरावलोकन गर्ने जनाएको छ ।
राष्ट्र बैंकले बजार घटेर न्यून विन्दुमा आउँदासम्म टुलुटुलु हेरर बस्ने तर अहिले ब्याजदर सस्तो भएको बेला बजार बढ्दा भने अंकुश लगाएको लगानीकर्ताको आरोप छ ।
राष्ट्र बैंकले नै चालू आर्थिक वर्षको मौद्रिक नीतिमार्फत ६५ प्रतिशत रहेको सेयर धितोकर्जाको सीमा ७० प्रतिशत पुर्याएको थियो । तर, अहिले कार्यान्वयनमा आएको ४ महिना नबित्दै फेरि अंकुश लगाउन खोजेर लगानीकर्ताको सम्पत्ति माथि खेलवाड गरेको लगानीकर्ताको भनाइ छ ।
आजै सेयर लगानीकर्ताको विभिन्न संघले राष्ट्र बैंकका डेपुटी गर्भनर चिन्तामणि शिवाकोटीलाई भेटेर सेयर बजार प्रभावित पार्ने गरी नीति परिमार्जन नगर्न आग्रह गरेका छन् ।
