काठमाडौं । नबिल बैंकलाई उछिन्दै नेपाल पुनर्बीमा कम्पनी बजार पूँजीकरणका आधारमा दोस्रो ठूलो कम्पनी बनेको छ ।
पछिल्लो एक सातामै सेयर मूल्य १०० रुपैयाँभन्दा धेरैले बढेपछि नबिललाई पछि पार्दै दोस्रो ठूलो कम्पनी बनेको हो । पछिल्लो सातामै बजार पूँजीकरण १३ अर्ब रुपैयाँले बढेर ९८ अर्ब ३० करोड रुपैयाँ पुगेको छ ।
नेप्सेका अनुसार सेयर बजार पूँजीकरणका आधारमा नेपाल टेलिकम सबैभन्दा ठूलो कम्पनीको रुपमा रहेको छ । टेलिकमको बजार पूँजीकरण १ खर्ब ४३ अर्ब १० करोड रुपैयाँ छ ।
यस्तै तेस्रो स्थानमा ८९ अर्ब ४५ करोड बजार पूँजीकरण सहित नबिल बैंक रहेको छ भने ८३ अर्ब ४८ करोड रुपैयाँ पूँजीकरण रहेको नेपाल लाइफ इन्स्योरेसन चौथो स्थानमा रहेको छ ।
यस्तै, बजार पूँजीकरणका आधारमा नागरिक लगानी कोष ७३ अर्ब १७ करोड पाँचौं, एनआइसी एशिया बैंक ६२ अर्ब ५८ करोड, एनएमबी बैंक ६१ अर्ब ८३ करोड रुपैयाँ सहित क्रमशः शीर्ष सात स्थानमा रहेका छन् ।
त्यसैगरी, ६० अर्ब ९८ करोड बजार पूँजीकरण रहेको नेपाल इन्भेष्टमेन्ट बैंक आठौं, ५६ अर्ब १३ करोड रुपैयाँ सहित हिमालयन बैंक नवौं र ५५ अर्ब ९८ करोड रुपैयाँसहित एभरेष्ट बैंक दशौं स्थानमा रहेको छ ।
नेप्सेका अनुसार सूचीकृत कम्पनीहरुको कुल बजार पूँजीकरण २३ खर्ब २ अर्ब ७६ करोड रुपैयाँ रहेको छ । यो नेपाली सेयर बजारको इतिहासमा अहिलेसम्मकै धेरै हो ।
