काठमाडौं । लक्ष्मी बैंकको प्रवद्र्धनमा लक्ष्मी क्यापिटल अन्तर्गत सञ्चालित सामूहिक लगानी कोष लक्ष्मी भ्यालु फण्ड–१ ले लगानीकर्तालाई १५ प्रतिशत नगद लाभांश दिने घोषणा गरेको छ ।
बुधबार बसेको क्यापिटल सञ्चालक समिति बैठकले आर्थिक वर्ष २०७५/०७६ को लागि कर सहित १५ प्रतिशत नगद लाभांश वितरण गर्ने निर्णय गरेको हो।
कम्पनीले सार्वजनिक गरेको वित्तीय विवरण अनुसार असार मसान्तसम्ममा लक्ष्मी भ्यालु फण्ड १ को प्रति इकाइ खुद मूल्य ११.९८ रुपैयाँ रहेको छ । धितोपत्रको दोस्रो बजारमा साउन १६ गते फण्डको प्रतिईकाइ मूल्य १० रुपैयाँ ७५ पैसा छ।
लक्ष्मी भ्यालु फण्ड १ लक्ष्मी क्यापिटलले सञ्चालनमा ल्याएको पहिलो सामूहिक लगानी कोष योजना हो। यसका अतिरिक्त कम्पनीले लक्ष्मी इक्विटी फण्ड नामको दोस्रो योजना समेत सञ्चालन गरेको छ।