काठमाडौं । सेयर बजार कमब्याक भएको छ । पछिल्ला ५ दिनमा करिब ३५ अंकले घटेको बजार आज दोहोरो अंकले बढेको छ ।
सूचमा सुधार आए पनि दशैं लागेसँगै बजारमा लगानीकर्ताको उपस्थिति पनि घट्न थालेको छ । जसको प्रभाव कारोबार रकम ह्वात्तै घटेको छ । यसअघि दैनिक औसतमा डेढ अर्ब बढीको कारोबार हुँदै आएकोमा आज १ अर्ब मुनि सीमित भएको छ ।
सेयर बजार मापक सूचक नेप्से १३.५८ अंकले बढेर १५७०.३८ विन्दुमा पुगेको छ । यसदिन १८९ कम्पनीको ९५ करोड ४६ लाख ५६ हजार १०६ रुपैयाँ बराबरको कारोबार भएको छ । ३२ लाख २६ हजार ८६७ कित्ता सेयर किनबेच भएका छन् ।
कारोबारमा आएका १२ वटा समूहमध्ये व्यापार समूह बाहेक अन्य सबै समूहको परिसूचक हरियो भएका छन् । आज निर्जीवन बीमा समूहको परिसूचक सबैभन्दा धेरै ९९.५२ अंकले बढेको छ भने व्यापार समूहको परिसूचक १.६९ अंकले घटेको छ ।
कारोबारका आधारमा आज अपी पावर कम्पनीको सेयर शीर्ष स्थानमा रह्यो । यसको सबैभन्दा धेरै ४ करोड २ लाख रुपैयाँभन्दा बढीको सेयर किनबेच भएको छ । कारोबारकै आधरमा नेपाल अरुण काबेली हाइड्रोपावर र एनसीसी बैंकको सेयर क्रमशः दोस्रो र तेस्रो स्थानमा रहे ।
आज लगानीकर्ता फेरि हाइड्रोपावर कम्पनीको सेयरमा झुम्मिएका छन् । कारोबारमा आएका अधिकांश हाइड्रो कम्पनीको सेयर सेयर मूल्य बढेको छ ।
आज ४ कम्पनीको मूल्यमा पोजेटिभ सर्किट लागेको छ । आज जनरल इन्स्योरेन्स, युनियन, घलेम्दी र अपी पावरको सेयरधनीले करिब १० प्रतिशत कमाएका छन् ।
आज गणपति माइक्रोफाइनान्सका सेयरधनीले सबैभन्दा धेरै १.९१प्रतिशतले गुमाएका छन् ।
