काठमाडौं । जनरल इन्स्योरेन्सको प्राथमिक साधरण सेयर (आइपीओ) नेपाल स्टक एक्सचेन्जमा सूचीकृत भएको छ ।
कम्पनीले सोमबार सर्वसाधरणतर्फको ३० लाख कित्ता र संस्थापकतर्फको ७० लाख गरी कुल १ करोड कित्ता सेयर नेप्सेमा सूचीकृत गरेको हो ।
नेप्सेमा सूचीकृत भएसँगै जनरलको सेयर मंगलबारदेखि दोस्रो बजारमा कारोबारमा आउने भएको छ । कम्पनीको पहिलो कारोबारका लागि नेप्सेले १०१.७६ रुपैयाँ देखि ३०५.२८ रुपैयाँ ओपन रेञ्ज तोकेको छ । यसकै बीचमा रहेर पहिलो कारोबार शुरु हुनेछ ।
कम्पनीले ११ गतेदेखि १०० रुपैयाँ अंकित दरमा ३० करोड रुपैयाँ बराबरको ३० लाख कित्ता आइपीओ निष्काशन गरेको थियो । जसमा कुल ७ लाख ९४ हजार ५४६ जनाले आवेदन दिएका थिए । त्यसमध्ये २ लाख ७३ हजार जनाले १० कित्ताका दरले सेयर पाएका थिए भने ५ लाख २१ हजार ५४६ जनाको हात खालि भएको थियो ।
हाल ७० करोड कम्पनीको चुक्ता पूँजी रहेको कम्पनीको आइपीओपछि चुक्ता पूँजी १ अर्ब रुपैयाँ पुगेको छ । इन्स्योरेन्सले गत आर्थिक वर्षमा २० करोड ९६ लाख रुपैयाँ खुद बीमाशुल्क आर्जन गरी ५ करोड ६ लाख नाफा कमाएको थियो ।
