काठमाडौं । अपि पावर कम्पनीले निर्माण गर्न लागेको ४० मेगावाटको माथिल्लो चमेलिया जलविद्युत् आयोजनाको लगानी जुटेको छ ।
आयोजनामा हिमालयन बैंकको नेतृत्वमा ७ बैंक तथा संस्थाले लगानी गर्ने भएका छन् । आयोजनामा हिमालयनको नेतृत्वमा कर्मचारी संचय कोष, राष्ट्रिय वाणिज्य, नेपाल बैंक, नेपाल बङ्गलादेश बैंक र सेञ्चुरी कमर्शियल बैंकले ५ अर्ब १८ करोड रुपैयाँ (कुल लागतको ७० प्रतिशत) ऋण लगानी गर्ने भएका हुन् ।
आयोजनाको ऋण लगानी सम्बन्धी आइतबार हिमालयन बैंक र अपी पावर कम्पनी बीच सम्झौता भएको छ ।
आयोजनाको सम्पन्न गर्दा कुल ७ अर्ब ४० करोड रुपैयाँ लगानी लाग्ने अनुमान गरिएको छ । त्यसमध्ये ७० प्रतिशत बैंकहरुले र बाँकी ३० प्रतिशत अपि पावरले स्वपूँजी मार्फत जुटाउने छ । जसका लागि अपिले २ अर्ब २२ करोड रुपैयाँ बराबरको हकप्रद निष्काशन गर्ने तयारी गरिरहेको छ ।
माथिल्लो चमेलिया अपिले निर्माण गर्न लागेको तेस्रो आयोजना हो । अपिले पहिलो आयोजनाको रुपमा ८.५ मेगावाटको नौगडगाढ जलविद्युत् र दोस्रो आयोजना ८ मेगावाटको अपर नौगडगाढ जलविद्युत् आयोजना सम्पन्न गरीसकेको छ ।
सुदूर पश्चिम प्रदेश, दार्चुला जिल्ला, अपि हिमाल र मार्मा गाउँपालिका भई वहने चमेलिया नदीको पानी उपयोग गरिनेछ । अपि हिमाल गाउँपालिकाको ओखल भन्ने स्थानमा यस आयोजनाको बाँध बनाई ६ किलोमिटर लामो ३.२ डायामिटरको पेनस्टक पाइपको सहायताले चमेलिया नदीको पानी फर्काई मार्मा गाउँपालिकाको घट्टेगाढ भन्ने स्थानमा विद्युत् गृह निर्माण गरी ४० मेगावाट विद्युत् उत्पादन गर्नेछ । सो विद्युत् १६ किलोमिटर लामो १३२ के.भी. ट्रान्समिसन लाइनमार्फत विद्युत् प्राधिकरणको वलाँच सबस्टेशनमा ल्याई राष्ट्रिय ग्रिडमा जोडिनेछ ।
यस आयोजनाबाट वार्षिक २६ करोड ४१ लख युनिट विद्युत् उत्पादन हुनेछ । उत्पादित विद्युत् मध्ये ३० प्रतिशत हिँउदका ६ महिनामा र बाँकी ७० प्रतिशत वर्षाका ६ महिनामा उत्पादन हुनेछ । यस आयोजनाको विद्युत् विक्री्रबाट पहिलो वर्ष १६२ करोड आय आर्जन हुनेछ । यस आयमा ८ वर्षसम्म वार्षिक ३ प्रतिशतका दरले वृद्धि हुँदै जानेछ ।
अपि पावर कम्पनी २०६० असार ५ गते कम्पनी रजिष्ट्रारको कार्यालयमा दर्ता भई २०७० साउन ६ गते पब्लिक लिमिटेड परिणत भएको थियो । कम्पनीले जलविद्युत् सम्बन्धी व्यवसायमा लगानी गर्दै आएको छ । गरिरहेको कम्पनी हो । कम्पनीको हाल अधिकृत पूँजी ५ अर्ब, जारी पूँजी ४ अर्ब र चुक्तापूँजी १ अर्ब करोड रहेको छ ।
