काठमाडौं । नेपाल धितोपत्र बोर्डले यसै वर्षदेखि प्राइभेट इक्वीटी फण्ड तथा भेन्चर क्यापिटल जस्ता विशिष्टिकृत लगानी कोष संचालन गर्न अनुमति दिने भएको छ ।
आर्थिक वर्ष २०७७/७८ को धितोपत्र तथा वस्तु विनिमय बजारसम्बन्धी नीति तथा कार्यक्रम सार्वजनिक गर्दै बोर्डका अध्यक्ष भिष्मराज ढुंगानाले यस्तो जानकारी दिएका हुन् ।
बोर्डले सेयर बजारको विकास तथा विस्तारका लागि प्राइभेट इक्विटी, भेञ्चर फण्ड र हेज फण्ड लगायतका नयाँ संस्थाहलाई पूँजी बजारमा प्रवेश गराउने भएको हो ।
यस्तै बोर्डले १ अर्ब वा सो भन्दा बढीको पूँजीमा स्थापित सबै उत्पादनमूलक कम्पनीहरुलाई ३ वर्षभित्र पब्लिक लिमिटेड कम्पनीमा रुपान्तरण भई पूँजी बजारमा सूचीकृत हुनुपर्ने व्यवस्था गरेको छ ।
यस्तै, बोर्डले ५० करोड रुपैयाँभन्दा बढी चुक्ता पूँजी भएका प्राइभेट कम्पनीहरुलाई पब्लिक कम्पनीमा रुपान्तरण हुन प्रोत्साहन गर्दै त्यस्ता कम्पनीलाई ३ वर्षसम्म आयकरमा १० प्रतिशत छुट दिने व्यवस्था गरेको छ ।
‘टी प्लस टू’ कार्यान्वयनमा ल्याउने
यस्तै बोर्डले चालू आवमै वर्षदेखि धितोपत्र कारोबारमा टी प्लस टू कार्यान्वयनमा ल्याउने भएको छ । राफसाफ तथा फछ्र्यौट प्रणालीलाई छिटो छरितो बनाउन बोर्डले हालको टी प्लस थ्रीको व्यवस्था घटाएर टी प्लस २ बनाउन लागेको ढुंगानाले बताए ।
अहिलेसम्म सेयर किनेको तेस्र दिन मात्रै खातामा सेयर आउने र बेच्नेले पनि सोही दिन पैसा पाउने व्यवस्था छ । नयाँ व्यवस्था लागू भएपछि सेयर बेचेको दोस्रो दिनमै किन्नेको खातामा सेयर र बेच्नेको खातामा पैसा आउने छ ।
बोर्डले नेप्सेको ट्रेडिङ म्यानेजमेन्ट सिस्टम (टीएमएस) लाई प्रभावकारी बनाउने व्यवस्था मिलाउने भएको छ ।
