काठमाडौं । पर्यटकीय गन्तव्य नगरकोटदेखि काठमाडौंसम्म सिधा बस सेवा सुरु भएको छ । शुक्रबार चाँगुनारायण नगरपालिकाका प्रमुख जीवन खत्रीले नगरकोट-काठमाडौं बस सेवाको शुभारम्भ गरेका हुन् ।
नगरकोट भ्रमण वर्ष-२०८२ को पूर्वसन्ध्यानमा भक्तपुरको उत्तरपूर्वी यातायात प्रालि र ख्वप भक्तपुर मिनिबस यातायात प्रालिको संयुक्त रुपमा काठमाडौं रत्नपार्क-नगरकोट सिधा बस सेवा संचालनमा ल्याएका हुन् ।
यसअघि काठमाडौंबाट नगरकोट जान दुई वटा बस चढ्नुपर्ने अवस्था थियो । रत्नपार्कबाट कमलविनायकसम्म एउटा र कमलविनायकबाट नगरकोटसम्म अर्को बस चढ्नुपर्दथ्यो ।
काठमाडौं-नगरकोट रुटमा ६ वटा बस संचालन हुनेछन् । ती बस हरेक १ घण्टाको अन्तरमा संचालन हुनेछन् ।
बस सेवाको उद्घाटन गर्दै नगर प्रमुख जीवन खत्रीले नगरकोटबाट काठमाडौंसम्म सिधा बस सेवा सञ्चालन गर्न प्रयासले सार्थकता पाएको बताए । सिधा बस सेवाले काठमाडौंबाट नगरकोट आउन जान निकै सहज हुने उनको भनाइ छ ।
