काठमाडौं । सेयर बजारमा लगातार छैटौं दिन गिरावट आएको छ । गत सोमबारदेखि लगातार ओरालो लागेको नेप्सेले आज पनि सोही लय कायम राखेको हो । ६ दिनमा नेप्से १३८ अंकले घटेको छ ।
सोमबार नेप्से परिसूचक २०.६८ अंकले घटेर २७५१.४२ बिन्दुमा आइपुगेको छ । सूचकसँगै आज कारोबार रकममा पनि गिरावट आएको छ । अघिल्लो दिनको तुलनामा कारोबार रकम झण्डै २ अर्बले घटेर ८ अर्ब ३७ करोड रुपैयाँमा सीमित भएको छ ।
आज कारोबारमा आएका १३ वटा समूह मध्ये अन्य बाहेक अरु सबैको परिसूचकमा गिरावट आएको छ । म्युचुअल फण्ड समूहको परिसूचक सर्वाधिक ३.०६ प्रतिशतले घटेको छ ।
आज पनि पुनर्बीमा कम्पनीहरूको सेयरमा उच्च आकर्षण देखिएको छ । हिमालयन रि इन्स्योरेन्सको सर्वाधिक ७३ करोड ५० लाख रुपैयाँ बढीको सेयर किनबेच भएको छ । त्यस्तै, नेपाल पुनर्बीमा कम्पनीको दोस्रो धेरै ७३ करोड १७ लाख रुपैयाँको कारोबार भएको छ ।
आज कारोबारमा आएका मध्ये ४४ कम्पनीको मात्र सेयर मूल्य बढेको छ भने १९१ कम्पनीको मूल्य घटेको छ ।
घट्दो बजारमा आज नेष्डो समृद्ध लघुवित्तका सेयरधनीले सर्वाधिक ९.९८ प्रतिशत कमाएका छन् भने उपकार लघुवित्तका सेयरधनीले ६.९८ प्रतिशत गुमाएका छन् ।
