काठमाडौं । नेपाल दूरसञ्चार प्राधिकरणका पूर्वअध्यक्षद्वय दिगम्बर झा र पुरुषोत्तम खनाल मोबाइल डिभाइस म्यानेजमेन्ट सिस्टम (एमडीएमएस) भ्रष्टाचार मुद्दामा दोषी ठहर भएका छन् ।
विशेष अदालतका अध्यक्ष टेकनारायण कुँवर, सदस्यहरू रितेन्द्र थापा र विदुर कोइरालाको इजलासले झा र खनाललाई एमडीएमएस खरिद मुद्दामा भ्रष्टाचारी ठहर गरेको हो ।
एमडीएमएस खरिदमा भ्रष्टाचार गरेको भन्दै अख्तियार दुरुपयोग अनुसन्धान आयोगले २०८० पुसमा अध्यक्षद्धय सहित १४ जना विरुद्ध विशेष अदालतमा मुद्दा दायर गरेको थियो । उक्त मुद्दामा अध्यक्षद्धय दोषी ठहर भएका हुन् भने अरु कर्मचारीले सफाइ पाएका छन् ।
विशेष अदालतले अध्यक्षद्धयलाई समान १३ महिना कैद र ५ करोड ८० लाख रुपैयाँ जरिवाना तोकेको छ ।
अख्तियारले उनीहरूको मिलेमतोमा भन्सार छलेर ल्याइएका मोबाइल सेटलाई निष्कृय बनाउने उपकरण खरिदमा भ्रष्टाचार भएको भन्दै मुद्दा दायर गरेको थियो । अख्तियारले ठेक्का भएको रकम ९१ करोड ९८ लाख रुपैयाँ भ्रष्टाचार भएको दाबी गरेको थियो ।
तर, विशेष अदालतले भुक्तानी भएको रकमलाई मात्रै बिगो कायम गरी २३ करोड २० लाख ५९ हजार ३१४ मात्रै भ्रष्टाचार भएको ठहर गरेको छ ।
