काठमाडौं । अपि पावर कम्पनीको खुद नाफामा उछाल आएको छ । कम्पनीले आइतबार सार्वजनिक गरेको चालु आर्थिक वर्ष २०८१/८२ को दोस्रो त्रैमासको अपरिष्कृत वित्तीय विवरण अनुसार खुद नाफा १४ हजार ४४१.६३ प्रतिशतले बढेकोे छ ।
कम्पनीले चालु आवको पुस मसान्तसम्म ३१ करोड १६लाख रुपैयाँ खुद नाफा कमाएको छ । यो गत वर्षको सोही अवधिको तुलनामा १७ करोड १० लाख रुपैयाँ धेरै हो । अपिले गत वर्षको दोस्रो त्रैमाससम्म २१ लाख ४३ हजार रुपैयाँ खुद नाफा कमाएको थियो ।
समीक्षा अवधिमा अपिको संचालन आम्दानी र विद्युत् बिक्री आम्दानी बढ्दा नाफामा उछाल आएको हो । यस अवधिमा कम्पनीको संचालन आम्दानी ३८.३८ प्रतिशतले बढेर ८५ करोड ८० लाख रुपैयाँ पुगेको छ ।
गत वर्ष विद्युत् बिक्रीबाट ६२ करोड रुपैयाँ आम्दानी गरेको कम्पनीले यस वर्ष बढेर यस्तो आम्दानी ८५ करोड ८० लाख रुपैयाँ पुगेको छ ।
त्यस्तै, समीक्षा अवधिमा कम्पनीको कुल खर्च भने ५७.९९ प्रतिशतले बढेर ३३ करोड ९३ लाख रुपैयाँ पुगेको छ ।
हाल ६ अर्ब ७ करोड ५९ लाख रुपैयाँ चुक्ता पूँजी रहेको कम्पनीको अन्य इक्विटीमा ५५ करोड ७६ लाख रुपैयाँ संचित छ ।
खुद नाफा बढेसँगै पनि कम्पनीको प्रतिसेयर आम्दानी पनि उल्लेख्य रुपमा बढेको छ । गत पुसमा ७ पैसा रहेको कम्पनीको प्रतिसेयर आम्दानी यस वर्ष बढेर १०.२६ रुपैयाँ पुगेको छ ।
समीक्षा अवधिमा कम्पनीको प्रतिसेयर नेटवर्थ १०९.१८ रुपैयाँ छ ।
