काठमाडौं । त्रिभुवन अन्तर्राट्रिय विमानस्थल परिसरमा (सिनामंगलतर्फ) रहेको नेपाल आयल निगमको हवाई इन्धन डिपो स्थानान्तरण गरिने भएको छ । उक्त डिपोले हवाई जोखिम बढेको भन्दै निगमले स्थानान्तरण गर्न लागेको हो ।
निगमले अत्याधुनिक प्रविधि सहितको डिपो निर्माणका लागि विस्तृत संभाव्यता अध्ययन (डीपीआर) गर्न बुधबार नेपाल इञ्जिनियरिङ संस्थान, पुल्चोकसँग सम्झौता गरेको हो ।
मन्त्रिपरिषद्ले गत साउनमै निगमको डिपो स्थानान्तरण गर्ने निर्णय गरेको थियो । सोही अनुसार निगमले डीपीआर बनाउन इञ्जिनियरिङ संस्थानलाई जिम्मा दिएको हो । संस्थाले १ करोड ९८ लाख रुपैयाँमा डीपीआरको जिम्मा पाएको हो ।
नयाँ डिपो नागरिक उड्डयन प्राधिकरण (क्यान) को ५० रोपनी जग्गामा बन्ने छ । विमानस्थलको उत्तरतर्फ नेपाली सेनाको गल्फ कोर्श नजिकै गुह्येश्वरीमा डिपो स्थानान्तरण गरिने छ ।
अन्तर्राष्ट्रिय नागरिक उड्डयन संगठन (आइकाओ) को मापदण्ड अुनसार डिपो स्तरोन्नति गर्नुपर्ने भएकाले पनि अन्यत्र सार्न लागिएको हो । त्यस्तै, स्थानीयले समेत लामो समयदेखि डिपो स्थानान्तरणको माग गर्दै आएका थिए ।
तीन वर्षभित्रमा डिपो निर्माण कार्य सम्पन्न गरिने निगमको योजना छ।
