काठमाडौं । अरुण काबेली पावर लिमिटेडको खुद नाफामा सुधार आएको छ । कम्पनीले बुधबार सार्वजनिक गरेको चालु आर्थिक वर्ष २०८१/८२ को पहिलो त्रैमाससम्मको अपरिष्कृत वित्तीय विवरण अनुसार असोजसम्म ८ करोड ३३ लाख रुपैयाँ नाफा कमाएको छ ।
जबकि गत वर्ष यही अवधिमा कम्पनी १५ करोड ९४ लाख रुपैयाँ घाटामा थियो । कम्पनीले पुनः विद्युत् उत्पादन सुरु गरेसँगै नाफामा गएको हो ।
गत वर्ष आएको बाढीका कारण आयोजना बन्द हुँदा कम्पनीले विद्युत् बिक्रीबाट आम्दानी गर्न सकेको थिएन । चालु आवको असोज मसान्तसम्म कम्पनीले विद्युत् बिक्रीबाट २१ करोड ४३ लाख रुपैयाँ आम्दानी गरेको छ ।
समीक्षा अवधिमा कम्पनीको प्रशासनिक खर्च २९.३० प्रतिशतले घटेर ४८ लाख रुपैयाँमा झरेको छ भने वित्तीय खर्च ३५.८९ प्रतिशतले घटेर ६ करोड १० लाख रुपैयाँमा सीमित भएको छ ।
हाल ३ अर्ब ८९ करोड रुपैयाँ चुक्ता पूँजी रहेको यस कम्पनीको जगेडा कोषमा ९ करोड ६४ लाख रुपैयाँ ऋणात्मक छ ।
कम्पनीले नाफा कमाएसँगै प्रतिसेयर आम्दानी पनि धनात्मक भएको छ । समीक्षा अवधिमा कम्पनीको प्रतिसेयर आम्दानी ८.५६ रुपैयाँँ र प्रतिसेयर नेटवर्थ ९७.५३ रुपैयाँ छ ।
