काठमाडौं । १ महिनादेखि बन्द रसुवागढी केरूङ अन्तर्राष्ट्रिय राजमार्ग आजदेखि संचालनमा आएको छ । गत असोज १० देखि १२ गतेसम्म आएको बाढीपहिरोले क्षतिग्रस्त उक्त सडक मर्मत गरी आजदेखि सवारी साधन संचालनमा ल्याइएको हो ।
बाढीपहिरोले चिनियाँ भूभाग (केरुङ)तर्फ ठूलो क्षति पुर्याएको थियो । सयौं मिटर सडक नै बगाएको छ भने कैंयौं ठाउँमा भत्काएको थियो । अहिले ती ठाउँमा मर्मत गरी सवारीसाधन संचालनमा ल्याइएको हो । अहिले पनि मर्मत कार्य जारी रहेको छ ।
जिल्ला प्रशासन कार्यालय रसुवाका अनुसार आजदेखि कन्टेनर तथा साना गाडी नेपाल भित्र्न थालेका छन् । आज बिहान केरुङबाट सामान लोड गरेका कन्टेनर तथा साना गाडी कम्तिमा ५० वटा भित्रने सूचना प्राप्त भएको रसुवा भन्सार कार्यालयले जनाएको छ ।
अहिले पनि ठूला सवारीसधान चलाउन अनुमति दिइएको छैन । चिनियाँ अधिकारीहरूले सामानसहित १५ टन तौल भएका मालवाहक गाडी मात्र एकतर्फी आउजाउ गर्नसक्ने सूचना नेपालका अधिकारीहरूलाई पठाएका छन् ।
यस्तै, उक्त सडकमा सवारी चलाउन चिनियाँ पक्षले टाइम कार्ड समेत लागू गरेको छ । जिल्ला प्रसाशनमा चीनबाट आएको जानकारी अनुसार बिहान ८ बजेदेखि ११ बजेसम्म केरुङबाट सामान बोकेका कन्टेनर रसुवागढी आउने छन् भने अपराह्न ४ बजेदेखि ८ बजेसम्म रसुवागढीबाट सामान लिन केरुङ जाने सवारीसाधन संचालन हुनेछन् ।
त्यस्तै, बिहान ११ बजेदेखि बेलुकी ४ बजेसम्म चिनियाँहरूले क्षतिग्रस्त सडक बनाउने कार्यतालिका बनाएका छन् । सडक पूर्ण रुपमा बनिसक्न अझै समय लाग्ने चिनियाँ पक्षले जानकारी गराएको छ ।
अहिले केरुङमा नेपाल ल्याउन लागिएको ६०० कन्टेनर बढी सामान थन्किएर बसेको छ । १ महिना सकड बन्द हुँदा स्याउ, किवी, लसुन लगायत केही सामान कुहिएर खेर गएका थिए भने दशैं तिहारलाई लक्षित गरी ल्याइएका लत्ता, कपडा र सयौं संख्या विद्युतीय गाडी रोकिएका थिए । बाटो खुले पनि १५ टन बोकेको कन्टनेर मात्र आउजाउ गर्न पाउने भएकाले उक्त मालवस्तु आउन अझै समय लाग्ने व्यवसायीहरू बताउँछन् ।
