काठमाडौं । सेयर बजारमा भीषण पहिरो गएको छ । आइतबार एकैदिन ४७ अंकले घटेको नेप्से आज ५८ अंकले घटेको हाे । यस साता दुई दिनमै नेप्से १०५ अंकले घटेको छ ।
सोमबार नेप्से परिसूचक ५७.९९ अंकले घटेर २६३९.९२ बिन्दुमा आइपुगेको छ । आज ३१९ कम्पनीको १ करोड ३८ लाख ६३ हजार ४४३ कित्ता सेयर किनबेच भएको छ ।
सूचकसँगै आज कारोबार रकममा पनि भारी गिरावट आएको छ । अघिल्लो दिनको तु्लनामा कारोबार रकम २ अर्ब १८ करोड रुपैयाँले बढेर ५ अर्ब ९० करोड रुपैयाँ पुगेको छ ।
आज कारोबारमा आएका १३ वटै समूहको परिसूचक घटेको छ फाइनान्स समूहको परिसूचक सर्वाधिक ३.३८ प्रतिशतले घटेको छ ।
आज हिमालयन रि इन्स्योरेन्सको सर्वाधिक २२ करोड ३ लाख रुपैयाँको सेयर किनबेच भएको छ । त्यस्तै, ङादी ग्रुप पावरको १७ करोड ७६ लाख रुपैयाँको कारोबार भएको छ ।
आज कारोबारमा आएका मध्ये २३ कम्पनीको मात्र सेयर मूल्य बढेको छ भने २२१ कम्पनीको मूल्य घटेको छ । घट्दो बजारमा पनि आज विन नेपाल लघुवित्तका सेयरधनीले झण्डै १० प्रतिशत कमाएका छन् ।
आज ङादी ग्रुप पावरका सेयरधनीले सर्वाधिक ९.२० प्रतिशत गुमाएका छन् । त्यसैगरी, गुडविल फाइनान्स ५.६५ प्रतिशत, छ्याङ्दी हाइड्रोपावर, इस्टर्न हाइड्रोपावर, गोर्खा फाइनान्स, समृद्धि फाइनान्स, हिमालयन लघुवित्त र रिलायन्स फाइनान्सको सेयर मूल्य साढे ४ प्रतिशतले घटेको छ ।
