दमौली । तनहुँमा जिल्लामा एक वर्षको अवधिमा नागरिकताभन्दा बढी राहदानी वितरण भएको छ । जिल्ला प्रशासन कार्यालयले आर्थिक वर्ष २०८०/८१ मा १५ हजार ७७७ राहदानी वितरण गरेको छ ।
राहदानी लिनेमध्ये ६ हजार ७३४ महिला र ९ हजार ५३ पुरुष रहेका प्रशासन कार्यालयका प्रशासकीय अधिकृत विकास श्रेष्ठले जानकारी दिए। उनका अनुसार सोही अवधिमा १६ हजार ७४३ राहदानी सिफारिस गरिएको छ ।
कार्यालयले एक वर्षको अवधिमा ८ हजार ९५५ नागरिकता वितरण गरेको छ । तीमध्ये वंशजको आधारमा आठ हजार ९४६ र वैवाहिक अङ्गीकृतको आधारमा नौजनालाई नागरिकता वितरण गरिएको छ । नागरिकता प्राप्त गर्नेमध्ये चार हजार सात सय २८ महिला र ४ हजार २२६ पुरुष छन् ।
यसैगरी, ७ हजार ६६१ जनालाई नागरिकताको प्रतिलिपि र ४३ जनालाई गैरआवासीय नागरिकता वितरण गरिएको कार्यालयले जनाएको छ । साथै सोही अवधिमा नौ महिला र १९ पुरुष गरी २८ जनाको नागरिकता रद्द गरिएको प्रशासकीय अधिकृत श्रेष्ठले जानकारी दिए ।
वैदेशिक रोजगारीमा जाने जिल्लामध्ये गण्डकी प्रदेशमा तनहुँ उच्च भएकाले पनि नागरिकताभन्दा बढी राहदानी वितरण भएको हुनसक्ने प्रमुख जिल्ला अधिकारी जनार्दन गौतमले बताए । उनका अनुसार कार्यालयबाट ५१५ जनालाई नाबालक परिचयपत्र, १४ जनालाई प्रतिलिपि वितरण गरिएको छ । २५ हजार २२७ जनाको राष्ट्रिय परिचयपत्र नयाँ दर्ता गरिएको छ भने १ हजार १४ परिचयपत्र वितरण गरिएको कार्यालयले जनाएको छ ।
८४५ लाई जनजाति प्रमाणित, ४१८ लाई दलित प्रमाणित, एक सयलाई विपन्न खस आर्य प्रमाणित, ३८ लाई मुस्लिम प्रमाणित गरिएको प्रमुख जिल्ला अधिकारी गौतमले जानकारी दिए । उनका अनुसार १५८ जनाको तिब्बतीयन शरणार्थी परिचयपत्र नवीकरण गरिएको छभने १२ जनालाई यात्रा अनुमतिपत्र सिफारिस गरिएको छ ।
सोही अवधिमा कार्यालयमा १४५ मुद्दा दर्ता भएकामा ७९ फछ्र्यौट भएका छन् । संस्था दर्तातर्फ २५ नयाँ, ६८७ नवीकरण, हातहतियारतर्फ तीन नवीकरण र एक नामसारी भएका छन् ।
कार्यालयले संस्था दर्ताबाट रु १० लाख ३० हजार छ सय १०, हातहतियारबाट रु ६ लाख १ हजार १२५, राहदानी दस्तुरबाट रु ८ करोड ४६ लाख ५३ हजार ५००, न्यायिक दण्ड जरिवानाबाट रु ११ लाख ५० हजार ६३८, प्रशासनिक दण्ड, जरिवाना र जफतबाट रु २ लाख २३ हजार राजश्व सङ्कलन गरेको जनाएको छ ।रासस
