काठमाडौं । मंगलबार राति परेको अविरल वर्षापछि आएको बाढीको कारण काठमाडौं उपत्यकाका दर्जन बढी ठाउँ डुबानमा परेका छन् ।
उपत्यकाका बागमती, विष्णुमती, धोवीखोला, मनोहरा, हनुमन्ते, गोदावरी, नख्खु लगायत नदी तथा खोलाहरूमा आएको बाढीले नदी किनाराका अधिकांश बस्ती डुबाएको हो ।
हनुमन्ते खोलामा आएको बाढीले भक्तपुरको सूर्यविनायक, इन्द्रायणी, राधेराधे लगायत क्षेत्र डुबाएको छ । त्यसैगरी, धोवीखोलाले अनामनगर, बिजुलीबजार लगायत क्षेत्र डुबाएको छ ।
ललितपुरको गोदावरी खोलामा आएको बाढीले चाँगाथली, टिकाथली लगायत क्षेत्र डुबाएको छ । त्यस्नै, बागमतीमा आएको बाढीले च्यासल, शंखमूल, थापाथली, टेकु, बल्खु लगायत क्षेत्र डुबाएको छ । वागमतीको बाढीले बल्खु तरकारी बजार क्षेत्रमा रोकिराखेका दुई वटा ट्रक पल्टाएको छ ।
बाढीका कारण उपत्यकाका अधिकांश नदी करिडोरका सडक प्रभावित भएका छन् । गहिरो स्थान तथा पुल पानीको आहाल जमेको छ भने अन्य स्थानमा बालुवासहितको हिलो भरिएको छ ।
बाढी तथा डुबानबाट भौतिक क्षति भए पनि हालसम्म मानवीय क्षति भने नभएको प्रहरीले जनाएको छ । प्रहरीले विभिन्न डुबान क्षेत्रबाट २४ जनाको उद्धार गरेको छ ।
गएराति ११ बजेदेखि उपत्यकामा धेरै स्थानमा भारी वर्षा भएको जल तथा मौसम विज्ञान विभागले जनाएको छ । बागमती, हनुमन्ते, मनोहरा, धोविखोला, विष्णुमती लगायत सबै खोलामा जलसतह खतराको नजिक पुगेको र ललितपुरको गोदावरीखोलाले जलसतह खतराको तह पार गरेको विभागको तथ्यांक छ ।
जलसतह बढ्दो क्रममा रहेकाले नदी तटीय क्षेत्रमा बाढीको जोखिम रहेको छ। उक्त क्षेत्रमा रहनेहरूलाई बिहान १० बजेसम्म उच्च सतर्कता अपनाउन विभागको अनुरोध छ।
