काठमाडौं । नवनियुक्त प्रधानमन्त्री खड्गप्रसाद (केपी) शर्मा ओलीले पद तथा गोपनीयताको शपथ लिएका छन् । सोमबार राष्ट्रपति रामचन्द्र पौडेलले शितलनिवासमा प्रधानमन्त्री ओलीलाई सपथ खुवाएका हुन् ।
ओलीलाई आइतबार राष्ट्रपति पौडेलले संविधानको धारा ७६ (२) अनुसार प्रधानमन्त्रीमा नियुक्त गरेका थिए । ओली प्रधानमन्त्री बनेको यो चौथोपटक हो ।
उनी यसअघि २०७२ असोज २४ गते पहिलोपटक प्रधानमन्त्री बनेका थिए । त्यसपछि २०७४ को प्रतिनिधिसभाको चुनावपछि सबैभन्दा ठूलो दलको हैसियतमा ओली २०७४ फागुन ३ गते दोस्रोपटक प्रधानमन्त्री बनेका थिए । त्यस्तै, २०७८ साल वैशाख ३० गते राष्ट्रपति विद्यादेवी भण्डारीले ओलीलाई प्रधानमन्त्रीमा नियुक्त गरेकी थिइन् ।
शुक्रबार प्रचण्ड नेतृत्वको सरकार ढलेसँगै ओली नयाँ सरकारको प्रधानमन्त्री बनेका हुन् । उनलाई संसदको सबैभन्दा ठूलो दल नेपाली काँग्रेससहित दलहरूको समर्थन छ ।
प्रधानमन्त्री ओलीले आजै मन्त्रिपरिषद् विस्तारको तयारी गरेका छन् ।
