काठमाडौं । आइतबार सम्पन्न प्रदेश र प्रतिनिधि सभा निर्वाचनको मत गणना सुरु भइसकेको छ भने केही स्थानको मत परिणाम समेत आउन थालेको छ ।
मत गणना जारी रहेका सहरी इलाकाका निर्वाचन क्षेत्रहरुमा नयाँ उम्मेदवारले सुरुआती अग्रता लिएका छन ।
एकतिर काँग्रेस, माओवादी र एकिकृत समाजवादी सहितको बाम लोकतान्त्रिक गठबन्धन र अर्कोतर्फ एमाले, राप्रपाको गठबन्धनलाई टक्कर दिँदै रवी लामिछाने नेतुत्वको राष्ट्रिय स्वतन्त्र पार्टीका उम्मेदवारले मतगणना जारी केही स्थानमा मतान्तर फराकीलो बनाउँदै लगेका छन ।
प्रारम्भिक मत परिणाम अनुसार काठमाडौंको क्षेत्र नं ६ मा राष्ट्रिय स्वतन्त्र पार्टीका उम्मेदवार शिशिर खनालले अग्रता लिएका छन ।५०० सय मत गणना हुँदा खनालले १७२ मतसहित अग्रता लिएका छन् । उनको प्रतिस्पर्धी एमाले उम्मेदवार सर्वेन्द्र खनालले १४२ र नेपाली कांग्रेसका उम्मेदवार भीमसेनदास प्रधान १०८ मतसहित तेस्रो स्थानमा छन् । यो निर्वाचन क्षेत्रमा ३८ हजार ३८० मत खसेको थियो ।
काठमाडौं १ मा राष्ट्रिय स्वतन्त्र पार्टीका अध्यक्ष पुकार बम तेस्रो स्थानमा छन् । यस क्षेत्रमा पहिलो स्थान काँग्रेसका उम्मेदवार गणेशमान सिंहले लिएका छन भने दोस्रोमा रबीन्द्र मिश्रले पछ्याइ रहेका छन् ।
प्रारम्भिक मत परिणाम अनुसार ललितपुरका तीन निर्वाचन क्षेत्रमा मतगणना भइरहेकोमा सबै क्षेत्रमा राष्ट्रिय स्वतन्त्र पार्टीका उम्मेदवारहरु तेस्रो स्थानमा छन् । ललितपुर १ मा सचिनकुमार घिमिरे, २ मा बुद्धरत्न महर्जन र ३ मा तोसिमा कार्की तेस्रो स्थानमा छन् ।
निर्वाचन आयोगका अनुसार प्रतिनिधि सभाको लागि हालसम्म एक ठाउँको मत गणना सकिएर काँग्रेसका उमेदवार विजय भएका छन । मुस्ताङमा काँग्रेसका युवा उम्मेदवार योगेश गौचन थकाली निर्वाचित भएका छन । २९ वर्षीय गौचनले एमालेका पूर्वसांसद ६० वर्षीय प्रेमप्रसाद तुलाचनलाई पराजित गरेका हुन ।
यो सामग्री तयार पार्ने अवधिसम्म मत गणना जारी स्थानमध्ये काँग्रेसले ३ स्थानमा अग्रता लिएको छ भने एकमा विजय भएको छ । एमाले ८, राष्ट्रिय स्वतन्त्र पार्टीले ४, राप्रपाले २ र जनमत पार्टीले एक स्थानमा अग्रता लिएका छन् ।
काठमाडौं ४ मा प्रारम्भिक मतगणनामा नेपाली कांग्रेसका महामन्त्री गगन थापाले झिनो मतको अग्रता कायम गरेका छन् । थापाले ६ सय ६८ मत प्राप्त गरेका छन् । उनका प्रतिदन्द्धि नेकपा एमालेका राजन भट्टराईले ६ सय ३३ मत प्राप्त गरेका छन् । हालसम्म १५ सय ११ मत गणना गरिएको छ । तेस्रो स्थानमा राष्ट्रिय प्रजातन्त्र पार्टीका ठाकुरमोहन श्रेष्ठले ६५, मत प्राप्त गरेका छन् ।
सप्तरी क्षेत्र नम्बर २ मा जनमत पार्टीका अध्यक्षसमेत रहेका चन्द्रकान्त(सीके) राउत प्रतिस्पर्धीले जनता समाजवादी पार्टीका अध्यक्ष उपेन्द्र यादवभन्दा दोब्बर मतले पछि पारेका छन् ।
राउतले १०२० मत ल्याउदा एमालेसँग तालमेल गरेका जसपा अध्यक्ष यादवले ४५२ मत ल्याएका छन् । तेस्रो स्थानमा लोकतान्त्रिक समाजवादी पार्टीका उम्मेदवार जयप्रकाश ठाकुरले ३०८ मत ल्याएका छन् ।
यसैगरी, काठमाडौं ७ मा राष्ट्रिय स्वतन्त्र पार्टीका गणेश पराजुली र ८ मा विराजभक्त श्रेष्ठले प्रतिस्पर्धीहरुलाई पछि पारेका छन् । मत गणना सुरु भएको क्षेत्र मध्ये भक्तपुरमा काँग्रेसका उम्मेदवारले एमालेका महेश बस्नेतलाई पछि पारेका छन् ।
