काठमाडौं । राष्ट्रिय स्वतन्त्र पार्टी (रास्वपा)ले चुनावी घोषणापत्र सार्वजनिक गरेको छ । पार्टी सभापति रवि लामिछानलेसहित नेताहरूले बिहीबार बिहान नेपाल प्रज्ञा प्रतिष्ठान कमलादीमा आयोजित कार्यक्रममा ‘वाचापत्र’ सार्वजनिक गरेका हुन् ।
घोषणा पत्रमा आगामी ३० वर्ष अर्थात् वि.सं. २११० सम्ममा नेपालबाट गरिबी उन्मूलन गर्ने जनाएको छ । त्यस्तै आगामी वि.सं. २११० सम्म कुनै पनि नेपाली रोजगारीका लागि विदेश जान नपर्ने पनि रास्वपाले वाचा गरेको छ ।
नेपालको संविधानमा लिपिबद्ध ‘समाजवादप्रति प्रतिबद्धता’ लाई ध्यानमा राखेर वि.सं. २११० सम्म नेपालमा समाजवादको आधार तय गरिने पनि रास्वपाको प्रतिबद्धता छ । त्यस्तै नेपाल विश्वमै न्यून भ्रष्टाचार हुने मुलुकमा पर्ने वाचापत्रमा उल्लेख छ ।
त्यस्तै स्वतन्त्र पार्टीले पाँच वर्षभित्र वैदेशिक लगानीलाई कम्तीमा १५ गुणाले वृद्धि गर्ने प्रतिबद्धता जनाएको छ । ‘विश्व बैंक व्यवसायका लागि सहजता सूचकांकमा व्यापक सुधार गरी प्रत्यक्ष वैदेशिक लगानीलाई वर्गीकरण गरी, प्राथमिकताका क्षेत्रमा आउने वैदेशिक लगानीलाई एकद्वार प्रणाली अन्तर्गत ल्याइनेछ । पाँच वर्षभित्र वैदेशिक लगानीलाई कम्तीमा १५ गुणाले वृद्धि गरिनेछ,’ घोषणापत्रमा भनिएको छ ।
स्वतन्त्र पार्टीले ‘वडा एक व्यवसाय अनेक’ योजना पनि अघि सार्ने जनाएको छ । ‘वडा एक व्यवसाय अनेक योजना अन्तर्गत लघु, साना तथा मझौला व्यवसाय स्थापनामा सहजीकरणका लागि हरेक वडामा एकद्वार प्रणाली स्थापना गरिनेछ ।
यस्तो एकद्वार प्रणालीले ४८ घण्टाभित्र व्यवसाय निःशुल्क दर्ता गर्नेदेखि व्यवसायका विभिन्न आयाममा सहयोग गर्ने व्यवसाय कोरल्ने केन्द्रसँग व्यवसायीलाई प्रत्यक्ष जोड्नेछ । पहिलो चरणमा हरेक प्रदेशमा न्यूनतम दुईवटा व्यवसाय कोरल्ने केन्द्र स्थापना गरिनेछ,’ वाचापत्रमा भनिएको छ ।
यस्तै, पार्टीले चितवनलाई आर्थिक राजधानी बनाउने वाचा गरेको छ । पार्टी सभापति लामिछाने चितवन २ बाट उमेदवार उठेकाले चितवनलाई विशेष प्राथमिकतामा राखेको छ । ‘चितवनलाई नेपालको आर्थिक राजधानी बनाउन चाहिने कानुनी प्रावधान, लगानी, जनशक्ति,ऊर्जा आदि विभिन्न पक्षहरूलाई उच्च प्राथमिकता दिई काम गरिन्छ,’ वाचापत्रमा भनिएको छ ।
त्यस्तै, चितवनमा २५० मेगावाटको सैर्य ऊर्जा प्लान्ट स्थापना गरिने, हरित नारायणी करिडोर स्थापना तथा कर्पोरेट हेडक्वार्टर चितवन राख्ने संस्थालाई विशेष सहुलियत दिने रास्वपाले जनाएको छ ।
