काठमाडौं । आर्थिक संकटमा फसेको श्रीलंका राजनीतिक कारणले पनि तनावग्रस्त भएको छ । प्रधानमनत्रीले राजीनामा दिए पनि राष्ट्रपति गोताबाय राजपाक्षको राजीनामा माग गर्दै प्रदर्शन भइरहेको हो ।
जारी प्रदर्शन हिंसात्मक बन्दै गएपछि सरकारले देशभर कर्फ्यु लगाएको छ भने प्रदर्शनकारीहरुमाथि गोली चलाउन आदेश दिएको छ ।इतिहासकै खराब आर्थिक संकटको सामना गरिरहेको श्रीलंकाली नागरिकहरुले सरकारबिरुद्ध गरेको प्रदर्शनका कारण झन तनाव सिर्जना भएको हो ।
प्रदर्शनकारीहरुले श्रीलंकाका निवर्तमान प्रधानमन्त्री महिन्दा राजापाक्षेको एक घरसहित ५० भन्दा बढी नेताहरुको घर जलाइएको बीबीसीले जनाएको छ ।
सोमबार र मंगलबारको समय अवधिमा राजपाक्षे र नेताहरुको घर जलाइएको हो । घर आगजनीबाट मानवीय क्षति भने भएको छैन । प्रहरीले तत्काल सुरक्षा दिएर राजपाक्षेको परिवारका सदस्यलाई घरबाट निकालेकाले मानवीय क्षति हुन नपाएको प्रहरीले बताइएको छ ।
उक्त समयमा स्थिति नियन्त्रणमा लिन प्रहरीले अश्रुग्यास र हावाइ फायरसमेत गर्नु परेको थियो । त्यस्तै सोमबार नै ५० भन्दा बढी नेताहरुको घर जलाइएपछि ती नेताहरु शरण लिएर बसिरहेको बताइएको छ । यता राजपाक्षेको परिवारहरुलाई भने सुरक्षाकर्मीले घरबाट बाहिर निकालेर पूर्वोत्तर क्षेत्रमा रहेको त्रिनकोम नौसैनिक अड्डामा राखेको बीबीसीले जनाएको छ ।
प्रदर्शनका क्रममा हालसम्म ७ जनाले ज्यान गुमाइसकेका छन् भने २०० भन्दा बढी घाइते भएका छन् । प्रदर्शनकारीहरुले अब राष्ट्रपति गोटाबाया राजापाक्षेको घरलाई निशाना बनाएका छन् । राष्ट्रपतिको घर अगाडी उनीहरुले ठूलो संख्यामा भेला भएर उनको राजीनामा माग गरिरहको बताइएको छ । एजेन्सी
