काठमाडौैं । अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सम्झौताको विरोधमा आह्वान गरिएको नेपाल बन्दको प्रभाव नगन्य देखिएको छ ।
एमसीसी संसदबाट पास गरिएको विरोधमा विभिन्न कम्युनिष्ट पार्टी र मोर्चा गरी ८ संगठनले सोमबार आह्वान गरेको नेपाल बन्दको प्रभावहीन देखिएको हो ।
काठमाडौं उपत्यकाका मुख्य तथा भित्री सडकहरुमा निर्वाध रुपमा सवारीसाधन चलेका छन् भने बजारका पसलहरु पनि खुलेका छन् । महानगरीय प्रहरी परिसरका अनुसार सडकमा सवारीसाधनको चाप बढ्दो क्रममा रहेको छ । यद्यपि, काठमाडौं बाहिरका केही ठाउँमा भने प्रभाव देखिएको छ ।
यसैबीच, एकाविहानै भने बन्दकर्ताले केही सवारीसाधनमा तोडफोड गरेका छन् । बन्दकर्ताले सुकेधारामा दूधको गाडी तोडफोड गरेका छन् । त्यस्तै, कलंकी र चाबहिलमा बन्दकर्ताले ३ वटा बसमा तोडफोड गरेको प्रहरीले जनाएको छ।
यस्तै, उपत्यका विभिन्न ठाउँबाट बन्द गराउन हिँडेका आधा दर्जन व्यक्तिलाई पक्राउ गरिएको प्रहरीले जनाएको छ ।
