अब काठमाडौं उपत्यका प्रवेश गर्न एन्टीजेन परीक्षण अनिवार्य
चाणक्य पोष्ट
प्रकाशित : 4:26 pm, सोमबार, चैत २३, २०७७

काठमाडौं । कोरोना संक्रमण बढ्दै गएसँगै फेरि काठमाडौं उपत्यका प्रवेशमा कडाइ गरिएको छ । अब उपत्यका प्रवेश गर्नेले अनिवार्य एन्टीजेन परीक्षण गर्नु पर्ने भएको छ ।

 

आइतबार बसेको काठमाडौं जिल्ला कोभिड १९ संकट व्‍यवस्थापन समितिको बैठकले उपत्यका प्रवेश गर्ने नाकामा एन्टीजेन परीक्षण गर्ने निर्णय गरेको हो ।

 

अब काठमाडौं उपत्यका प्रवेश गर्ने नाकाहरुमा सम्बन्धित नगरपालिकाले स्वास्थ्य जाँच र एन्टीजेन परीक्षण गर्न हेल्थ डेस्कको व्‍यवस्थापन मिलाउने र सम्पर्क व्‍यक्ति तोक्नु पर्नेछ ।

 

साथै उक्त एन्टीजेन किट स्वास्थ्य कार्यालयलाई उपलब्ध गराउनु पर्नेछ । परीक्षण गर्दा नेगेटिभ देखिए पनि शंकास्पद कोरोनाका लक्षण देखिएमा पीसीआर टेस्टको स्वाब संकलन गरी पठाउन समेत समितिले निर्देशन दिएको छ ।

 

यस्तै समितिले सबै नगरपालिकाहरुमा सञ्‍चालित आइशोलेशन केन्द्र र क्वारेन्टाइन सेन्टरहरुलाई अध्यावधिक गर्न र नगरपालिकाहरुलाई आ–आफ्नो नगरपालिका भित्र एक/एक वटा आइशोलेसन र क्वारेन्टाइनको व्‍यवस्थापन गर्न पनि आग्रह गरेको छ ।