काठमाडौं । काठमाडौं उपत्यकामा भदौ १० गतेसम्मका लागि निषेधाज्ञा लगाइने भएको छ ।
मंगलबार साँझ बसेको काठमाडौं, भक्तपुर र ललितपुरका प्रमुख जिल्ला अधिकारी र सुरक्षा निकायका प्रमुखहरुको संयुक्त बैठकले बुधबार रातिदेखि भदौ १० गतेसम्म उपत्यकामा निषेधाज्ञा गर्ने निर्णय गरेको हो ।
निषेधाज्ञा अवधिभर अत्यावश्यक सेवाका बाहेक निजी, सरकारी सम्पूर्ण कार्यालयका सेवाहरु बन्द हुनेछन् । यस्तै, एम्बुलेन्ससहित अत्यावश्यक सेवाका बाहेक निजी तथा सार्वजनिक सवारीसाधन सञ्चालनमा पनि रोक लगाइएको छ । सर्वसाधारणको आवतजावतलाई पनि निषेध गरिनेछ ।
पछिल्लो दिनहरुमा उपत्यकामा कोरोना संक्रमण तीव्र गतिमा फैलिएपछि त्यसलाई मध्येनजर गर्दै निषेधाज्ञा लगाइएको जनाइएको छ ।आज मात्रै काठमाडौं उपत्यकामा २०५ जनासहित १०१६ जनामा कोरोना संक्रमण देखिएको थियो ।
जोखिम बढेसँगै सोमबार बसेको मन्त्रिपरिषद्को बैठकले स्थानीय प्रशासनलाई निषेधाज्ञा लगाउन सक्ने अधिकार दिएको थियो ।
