काठमाडौं । कर्मचारी सञ्चय कोषले प्रदान गर्ने धितो कर्जा, अब सोझै ग्राहकको बैंक खातामा जम्मा हुने व्यवस्थाको आजबाट सुरु गरेको छ । कोषले यो सेवाको लागि नेपाल क्लियरिङ्ग हाउसको (एनसीएचएल–आइपीएस) तथा कनेक्ट आपीएस ए–पेमेन्ट प्रणालीहरुसँग पूर्ण रुपमा इन्टिग्रेसन गरेको छ ।
आफ्ना सम्पूर्ण भुक्तानी तथा संकलन सोझै बैंकखाता मार्फत गर्ने क्रममा कोषले आफ्नो धितो कर्जा स्किम अन्तर्गत स्विकृत भएको आवास कर्जाको भुक्तानी हालको लागि हिमालयन र एनएमबि बैंक मार्फत गर्ने भएको छ ।
लाभग्राहीले कोषमा आफ्नो बैंक खाता अध्यावधि गराएको अवस्थामा स्विकृत कर्जा, नेपाल क्लियरिङ्ग हाउसमा आबद्ध सदस्य बैंक तथा वित्तिय संस्थाहरुमा रहेकोे लाभग्राहीको जुनसुकै खातामा पनि सो रकम सोझै जम्मा गरिने छ भने सेवाग्राहीले रकम प्राप्त गर्न बैंक वा कोषको कार्यालय धाउनु पर्ने बाध्यता हटेको छ ।
यसरी जम्मा हुने रकममध्ये १० लाख सम्मको रकम कनेक्ट आइपीएस मार्फत रियल टाइममा जम्मा हुनेछ । यस्तै १० लाख भन्दा माथिको रकम नेपाल क्लियरिङ हाउसमार्फत सेटल्मेन्ट पश्चात सोही दिन वा अर्को दिन भुक्तानी हुने व्यवस्था गरेको छ ।
वार्षिक साढे २ लाखको संख्यामा भुक्तानी गर्ने यस कोषले कर्जा व्यवस्थापन सोझै लाभग्राहीको बैंक खातामा जम्मा गर्न विद्युत्तीय प्रणालीको प्रयोग गरी महत्वपूर्ण कदम चालेको छ । यस प्रणालीले कोषको आन्तरिक सञ्चालन कार्यमा सहजता ल्याउनुका साथै लाभग्राहीलाई थप सुविधा प्रदान गर्ने कोषले विश्वास लिएको छ ।
कर्मचारी सञ्चय कोष ऐन अन्तर्गत स्थापित कर्मचारी सञ्चय कोष नेपालको सबैभन्दा ठूलो कोष हो । यसमा साढे ५ लाखभन्दा बढी सञ्चयकर्ता र ३० हजार संस्थाहरु आबद्ध छन् ।
