काठमाडौं । राष्ट्रिय फुटबल टिमका पूर्व कप्तान सागर थापासहित सबै खेलाडीले म्याच फिक्सिङको मुद्दामा अन्तिम सफाइ पाएका छन् ।
सर्वोच्च अदालतले मंगलबार यसअघि विशेष अदालतले गरेकै फैसला सदर गर्दै तत्कालीन फुटबल टोलीका ६ जना सदस्यलाई नै सफाइ दिएको हो ।
मंगलबार सर्वोच्चका न्यायाधीश आनन्दमोहन भट्टराई र बमकुमार श्रेष्ठको संयुक्त इजलासले विशेष अदालतको फैसला सदर गर्दै तत्कालीन फुटबल टोलीका कप्तान सागर थापा, विकाससिंह क्षेत्री, रितेश थापा, सन्दीप राई, प्रशिक्षक तथा पूर्व खेलाडी अन्जन केसी र फिजियोथेरापिस्ट डेजिव थापालेलाई अन्तिम सफाइ दिएको हो ।
विभिन्न देशसँगको अन्तर्राष्ट्रिय फुटबल खेलमा म्याच फिक्सिङ गरेको भन्दै २०७२ असोज २७ गते प्रहरीले तत्कालिन कप्तान सागर थापासहित खेलाडीलाई पक्राउ गरी मुद्दा चलाएको थियो ।
उनीहरुलाई २०७५ जठ २४ गते विशेष अदालतले म्याच फिक्सिङ सम्बन्धी कानून नभएको भन्दै सफाइ दिएको थियो ।
