विश्व स्वास्थ्य संगठनका प्रमुख टेड्रोस एडनहम गेब्रियासिसले केही देशमा कोरोना भाइरसको संक्रमितको संख्यामा पहिलेको तुलनामा कमी आएता पनि विश्वव्यापी रुपमा यो थप खतरनाक भइरहेको बताएका छन्।
उनले पत्रकारसँगको कुराकानीमा पछिल्लो ९ दिनभित्र दैनिक १ लाख बढी संक्रमित भेटिएको जानकारी दिए। ‘पछिल्लो ९ दिनभित्र दैनिक १ लाख बढी संक्रमित भेटिएका छन्। र जतिपनि संक्रमित हिजो देखिएका छन् तीमध्ये ७५ प्रतिशत त १० देशका मात्रै नागरिक हुन्,’उनले भने। उनका अनुसार तीमध्ये पनि धेरैजसो संक्रमित अमेरिका र दक्षिण एसियाका हुन्।
डब्ल्यूएचओले कोरोना सम्बन्धी तथ्यांक सार्वजनिक गर्न ब्राजिललाई अपिल गरेको छ। डब्ल्यूएचओले ब्राजिलको यस कदममा चासो दिँदै तथ्य र पारदर्शिता अपनाउँदै विवरणहरु सार्वजनिक गर्न भनेको हो।
शनिबार ब्राजिलको स्वास्थ्य मन्त्रालयको वेबसाइटमा रहेको अहिलेसम्मको समग्र मृतक र संक्रमितको तथ्यांक हटाएर केवल पछिल्लो २४ घण्टामा भेटिएका संक्रमित र मृतकको तथ्यांक मात्र राखिएको थियो। यसपछि ब्राजिल सरकारले मृतकको वास्तविक संख्या लुकाइरहेको भन्दै आलोचना भइरहेको छ।
