काठमाडौं । उपत्यकाका तीनवटै जिल्लाका प्रमुख जिल्ला अधिकारी (सीडीओ)सहित सरोकारवाको बैठले लकडाउन खुकुलो बनाउन उच्चस्तरीय समिति समक्ष सिफारिस गरेको छ ।
बिहीबार जिल्ला समन्वय समिति काठमाडौंमा बसेको काठमाडौं, भक्तपुर र ललितपुरका सीडीओसहितको बैठकले उपप्रधानमन्त्री ईश्वर पोखरेलको नेतृत्वमा रहेका क्राइसिस म्यानेजमेन्ट सेन्टर (सीसीएमसी) र उच्चस्तरीय समितिमा लकडाउन खुकुलो बनाउन सिफारिस गर्ने निर्णय गरेको हो ।
उपत्यका व्यवसायीले लकडाउनको अवज्ञा गर्दै आजदेखि पसलहरु खोल्न थालेपछि त्यसलाई सहजीकरण गर्न तीनवटै जिल्लाका सीडीओहरु सकारात्मक भएका हुन् ।
बैठकले गरेको निर्णय उच्चस्तरीय समितिमा पठाउन जिल्ला प्रशासन कार्यालय काठमाडौंलाई जिम्मा दिइएको छ ।
सरकारले गत चैत ११ गतेदेखि लागू गरेको लकडाउन पटक पटक म्याद थप्दै जेठ ३२ गतेसम्म लम्ब्याएको छ । लकडाउनले गर्दा दैनिक जीविका चलाउनसमेत गाह्रो भएको भन्दै व्यावसायीहरुले बुधबार लकडाउन उल्लंघन गर्दै व्यापार, व्यावसाय सञ्चालन गर्ने निर्णय गरेका थिए ।
व्यावसायीले लकडाउन अवज्ञा गर्दै पसल खोल्न थालेपछि उपत्यकाका तीनै जिल्ला प्रशासन बाध्य भएर लकडाउन खुकुलो बनाउन तयार भएका हुन् ।
