कोरोना भाइरसले समग्र अर्थतन्त्रमा गिरावट ल्याएपछि भारत सरकारले सांसददेखि राष्ट्रिपतिसम्मको तलब कटौती गरेको छ ।
आज बसेको भारतको मन्त्रिपरिषद्को बैठकले राष्ट्रपति, उपराष्ट्रपति, प्रधानमन्त्री, संघीय मन्त्री र हरेक सांसदको १ वर्षको तलब ३० प्रतिशत कटौती गर्ने निर्णय गरेको हो । उक्त कटौती गरिएको रकम भारतको कन्सोलिडेटेड फन्डमा जम्मा हुनेछ ।
बैठकपछि सञ्चारकर्मीलाई ब्रिफिङ गर्दै संघीय मन्त्री प्रकाश जाभेदकरले सांसदसहित संघीय मन्त्रीको तलबमा एक वर्षका लागि ३० प्रतिशत कटौती गरेको जानकारी दिएका हुन् ।
उनले आजको मन्त्रिपरिषद् बैठकले सन् १९५४ को सांसदको तलब, भत्ता र पेन्सनसम्बन्धी ऐनमा गरिएको संशोधन अध्यादेश पारित गरेको बताएका छन् । यो निर्णय अप्रिल १ देखि एक वर्षका लागि लागू हुने बताइएको छ ।
यस्तै, आजको मन्त्रिपरिषद् बैठकले सांसदको निर्वाचन क्षेत्र विकास कोषलाई पनि २ वर्षका लागि रद्द गरिएको जनाइएको छ । भारतमा कोरोना भाइरसले पारेको असर र स्वास्थ्य क्षेत्रको व्यवस्थापनका लागि उक्त कोष स्थगित गरिएको मन्त्री जाभेदकरले बताएका हुन् ।
एजेन्सी
