काठमाडौं । कोरोना भाइरसको संत्रमण रोकथाम तथा नियन्त्रणको लागि सरकारले लागू गरेको लकडाउन उल्लंघन गर्ने ४ हजार २ सयभन्दा बढी सवारीसाधनलाई ट्राफिक प्रहरीले कारबाही गरेको छ ।
महानगरीय ट्राफिक प्रहरी महाशाखाका अनुसार लकडाउन शुरु भए (चैत्र ११ गते) देखि आज बिहान १० बजेसम्ममा काठमाडौं उपत्यकामा लकडाउन उल्लंघन गर्ने ४ हजार २३७ वटा सवारी साधन नियन्त्रणमा लिइएको छ । त्यस मध्ये ३ हजार ८४२ वटा दुईपाङ्ग्रे र ३९५ वटा चारपाङ्ग्रे सवारी रहेका छन् ।
ट्राफिक प्रहरीले आज बिहानमात्रै १४० सवारी साधनहरुलाई नियन्त्रणमा लिएको छ । नियन्त्रणमा लिइएका मध्ये १३१ वटा दुईपाङ्ग्रे र ९ वटा चारपाङ्ग्रे सवारी रहेका छन् ।
लकडाउनको आज १३ औं दिन चलिरहँदासम्म मानिसहरुले लकडाउन उल्लंघन गर्न छाडेका छैनन् । कोरोना भाइरसको संक्रमण न्यूनीकरणका लागि सरकारले पहिलोचरणमा यही चैत ११ गते बिहान ६ बजेदेखि चैत १८ गतेसम्म लकडाउन लागू गरेको थियो भने दोस्रो चरणमा चैत २५ गते राति १२ बजेसम्मका लागि तोकेको थियो ।
महानगरीय ट्राफिक प्रहरी महाशाखाले सबैमा अत्यावश्यक काममा बाहेक घरबाट बाहिर ननिस्कनहुन हार्दिक अनुरोध गरेको छ । त्यस्तै अत्यावश्यक सेवा र अनुमति प्राप्त बाहेक सबै प्रकारका सवारी साधन संचालन नगर्न समेत अनुरोध गरेको छ ।
