काठमाडौं । सार्वजनिक स्थललाई कीटाणुमुक्त बनाउन काठमाडौं महानगरले कीटनाशक औषधि छर्किने कामलाई तीव्र बनाएको छ । यस क्रममा आज बिहान ३ वटा जेटले औषधि छर्केको छ । तीन वटामध्ये एउटा बबरमहल – बानेश्वर – तीनकुने-सिनामंगल क्षेत्रमा खटिएको थियो ।
दोस्रो ट्यांकरबाट जमल -लाजिम्पाट- पानीपोखरीहुँदै महाराजगञ्ज क्षेत्रसम्म किटनाशक औषधि छर्किएको थियो । तेस्रोले वसन्तपुर आसपास क्षेत्रमा केन्द्रीत गरी औषधी छर्किएको थियो ।
नगर प्रहरी महाशाखा प्रमुख नगर प्रहरी नायव उपरीक्षक धनपति सापकोटाका अनुसार आज दिउँसोबाट महानगरका उपकरणसहित निजी क्षेत्रले सञ्चालनमा ल्याएका ट््यांकर परिचालन गरिने छ । ४० हजार लिटर पानीमा १४० लिटर क्लोरिन राखेर सार्वजनिक स्थलमा छर्किने आजको योजना रहेको नायव उपरीक्षक सापकोटाको भनाइ छ ।
बाक्लो बस्ती भएका क्षेत्र, अत्यावश्यक सामाग्री लिन चहलपहल धेरै हुने र अस्पताल क्षेत्रलाई प्राथमिकतामा राखेर सकेसम्म सेवालाई सहरभरि पुर्याउने योजना रहेको छ ।
बुधबार वीर अस्पताल, टेकु अस्पतालसहित भित्रि सहरका असन, इन्द्रचोकसँगै कालीमाटी तरकारी बजार लगायतका स्थानमा कीटनाशक औषधी छर्किएको थियो । यससँगै बु्रमरको प्रयोगले सडक सफा गर्ने र पानीले पखाल्ने काम पनि भइरहेको छ ।
