राष्ट्र सघंका स्वास्थ्य प्रमुख टेड्रस एडनम गेब्रिएससले विश्व भरका युवाहरूलाई आफूहरू कोरोना भाइरसको जोखिमबाट मुक्त छु भन्ने भ्रम नराख्न भनेका छन् ।
उनले युवा वर्ग प्रति लक्षित गर्दै भने, ‘तपाईंहरू अपवाद होइन । यो भाइरसले तपाइलाई हप्तौँ सम्म अस्पतालमा राख्न सक्छ र ज्यानै लिन पनि सक्छ’
गेब्रिएससले विश्वभर २ लाख ७२ हजार भन्दा बढी भाइरस सङ्क्रमण भएको पुष्टि भइसक्दा र यसबाट ११ हजार जनाले ज्यान गुमाएको बताउँदा सङ्क्रमण नियन्त्रणका लागि राष्ट्रहरू बिचको समझदारी मात्रले काम नगर्ने भन्दै अब उमेर समूहका बिच पनि एकता आवश्यक रहेको बताएका छन् ।
पछिल्लो विवरण
पछिल्लो समयमा कोरोना भाइरस सङ्क्रमणका कारण सबैभन्दा बढी प्रभावित भनिएको इटलीमा एक दिनमा नै यसका कारण ज्यान गुमाउनेहरूको संख्या ६२७ ले बढेर जम्मा ४०३२ पुगेको छ । एक दिनमा भएको १८.४ प्रतिशतको यो वृद्धि अहिले सम्मकै सबैभन्दा बढी हो ।
इटलीमा सङ्क्रमणको ४ हप्तामा नै कोभिड १९ का कारण ज्यान गुमाउनेहरूको संख्या चीनको भन्दा बढी देखिएको छ । शुक्रवार मात्र थप ६ हजारमा सङ्क्रमण भेटिए पछि सङ्क्रमितहरूको संख्या ४७ हजार २१ पुगेको छ ।
त्यस्तै स्पेनमा शुक्रवार थप २३५ मानिसहरूले ज्यान गुमाएका छन् भने मृतकहरूको कुल संख्या १० हजार नाघि सकेको छ ।
बेलायतमा प्रधानमन्त्री बोरिस जोन्सनले भिडभाड हुने पव तथा रेस्टुरेन्टहरू बन्द गर्न भनेका छन् । बेलायतमा सङ्क्रमितहरूको संख्या अहिले सम्म ३ हजार ९ सय ८३ रहेको बताइदा यसका कारण ज्यान गुमाउनेहरूको संख्या भने १ सय ७७ पुगेको छ ।
अमेरिकामा पनि दुई प्रमुख राज्यहरूले कोरोना भाइरस सङ्क्रमणका बिच कडा प्रतिबन्धहरू लागु गरेका छन् । न्यु योर्क र क्यालिफोर्नियाले अत्यावश्यक कार्य बाहेकका सम्पूर्ण कामदारहरूलाई घरमा नै बस्न भनेका छन् ।
न्यु योर्कमा अहिले सम्म ७ हजार १ सय २ सङ्क्रमण पुष्टि भएको छ भने क्यालिफोर्नियामा १० हजार सङ्क्रमित रहेको र यसका कारण १९ जनाले ज्यान गुमाई सकेका छन् ।
अमेरिकामा अहिले सम्म २ सय भन्दा बढीको मृत्यु भएको छ भने १४ हजार ६ सय मा कोभिड १९ सङ्क्रमण देखिसकेको छ । (एजेन्सी)
