काठमाडौं । पशुपति क्षेत्र विकास कोषले महाशिवरात्रीका लागि सम्पूर्ण तयारी पूरा भएको जानकारी दिएको हो । फागुन ९ गते (शुक्रबार) परेको महाशिवरात्रीमा पशुपतिनाथ दर्शन गर्न आउने भक्तजन र साधुसन्तको व्यवस्थापन गर्न आवश्यक पर्ने सबै तयारी पूरा गरिएको कोषले बताएको छ ।
पशुपति क्षेत्र विकास कोषले महाशिवरात्रिका लागि ७५ लाख रुपैयाँ विनियोजन गरेको छ । गुठी गोश्वाराले धुनीका लागि ४५ हजार किलो दाउरा पशुपतिमा ल्याइएको छ । संस्थानले विगतदेखि नै आएका साधुसन्तको स्वागत गर्ने उनीहरू रहुन्जेल खानपानको व्यवस्था गर्ने र दक्षिणासहित बिदाई गर्दै आएको छ ।
‘भक्तजनहरुलाई कुनै प्रकारका समस्या नहोस् । उनीहरुले सहजैसँग दर्शन गर्न पाउन भनेर विशेष तरिकाले लाइन व्यवस्थापनलाइ जोड दिइएको छ’, पशुपति क्षेत्र विकास कोषका कार्यकारी निर्देशक डा. घनश्याम खतिवडाले भने ।
महाशिवरात्रिको दिन एरपोर्ट, गौशला, पुरानो बानेश्वरदेखि सवारी साधन प्रवेशमा निषेध गरिइएको छ । त्यस्तै चाबहिलबाट यता आउने गाडीलाई रोक लगाइने छ ।
पशुपति क्षेत्र विकास कोषले सकेसम्म कुनै पनि त्रुटी नहोस् भनेर लाइन व्यवस्थापन सहज र सजिलो बनाउने उद्देश्यले विभिन्न प्रकारका ११ ओटा उप–समिति बनाएको छ ।
भोजनालय तथा आवास व्यवस्थापन समिति, दर्शन व्यवस्थापन समिति, मेला बजार व्यवस्थापन समिति, स्वास्थ्य व्यवस्थापन समिति, भौतिक व्यवस्थापन समिति लगायतका विभिन्न उप समितिहरु बनाएर व्यवस्थापन गरिएको खतिवडाले जानकारी दिए ।
यस वर्ष लगभग २० लाखको हाराहारीमा भक्तजन आउने अनुमान गरिएको छ । लाइन व्यवस्थापन पश्चात् भक्तजनले करीब आधा घण्टामा दर्शन गरेर फर्किने सक्नेछन् ।
महाशिवरात्रीको दिन पशुपति क्षेत्रका चार वटै मूल ढोका खोलिने छ । पश्चिम मूल ढोका, दक्षिणको ढोका, पूर्वी ढोका र उत्तर ढोकाबाट प्रवेश गरेर दर्शन गर्न मिल्ने छ । दर्शनार्थीको लागि भनेर प्रत्येक लाइनमा स्वयमसेवकको व्यवस्था गरिएको छ । भक्तजनहरुलाई दर्शनमा सहजताका लागि सिफल, गौराघाट, एयरपोर्ट, बत्तिसपुतली र चाबहिल मित्रपार्क गरी ५ वटा क्षेत्रबाट लाइनको व्यवस्था गरिएको छ ।
रातिको समयमा पनि दर्शन गर्न सकिनेगरी सुरक्षा व्यवस्था कडा गरिने आयोजकले बताएको छ । भक्तजनको सुरक्षा व्यवस्थालाई महत्वपूर्ण रूपमा लिइएको आयोजको भनाइ छ । सुुरक्षाका लागि नेपाल प्रहरीका ४ हजारभन्दा बढी कर्मचारी खटाइने छ । त्यस्तै राष्ट्रिय अनुसन्धान विभागका सादा पोशाकमा कर्मचारीहरु पनि खटाइने छन् ।
‘उक्त दिन भोजन, जलपान तथा स्वास्थ्य सेवा दिन चहाने इच्छुक सम्पूर्ण संघ संस्थाहरुको लागि उचित व्यवस्था गरिएको छ । दर्शन गर्न आउनु हुने कोही पनि भोका नहुन् भनेर उचित प्रबन्ध गरिएको हो’, कार्यकारी निर्देशक सापकोटाले भने ।
शिवरात्रीका दिन ठाउँ ठाउँमा अस्थायी शौचालहरुको समेत व्यवस्था गरिनुका साथै आकस्मिक स्वास्थ्य उचारका लागि स्वास्थ्य शिविर पनि संचालन ल्याइने उनले बताए ।
महाशिवरात्रिको दिन एरपोर्ट, गौशला, पुरानो बानेश्वरदेखि सवारी साधन प्रवेशमा निषेध गरिइएको छ । त्यस्तै चाबहिलबाट यता आउने गाडीलाई रोक लगाइने छ ।
भक्तजनहरुको लागि यस वर्ष विशेष पासको व्यवस्था भने गरिएको छैन । विशेष दर्शन पासका कारण पक्षपात हुने, आफ्ना आफन्तहरु च्याप्ने पद्धतिका कारण यो वर्ष हटाइएको हो ।
