काठमाडौं ।विश्वको १५ औं ठूलो औषधि उत्पादक कम्पनी ‘गिलियड साइन्सेस’ले उत्पादन गर्ने औषधिहरु सहजै रुपमा उपलब्ध गराउन एड्स हेल्थकेयर फाउन्डेसन (एएचएफ)ले माग गरेको छ ।
एएचएफले गिलियडले उत्पादन गर्ने एचआईभी र हेपाटाइटिस सीको औषधि विश्वव्यापी रूपमा सहज उपलब्ध हुने वातावरण मिलाउन माग गरेको हो ।
एएचएफले कम्पनीलाई मुनाफाभन्दा पहिले जीवनलाई केन्द्रमा राख्न सुझाव समेत दिएको छ ।कम्पनीले उत्पादन गर्ने औषधि अत्यधिक महँगो हुनुका साथै निम्न आय भएका देशहरूमा केही औषधिहरू दर्ता गर्न इन्कार गरेकाले त्यसलाई सहज बनाउनम एचएफले माग गरेको हो ।
गिलियड कम्पनीद्वारा उत्पादन हुँदै आएको विभिन्न औषधिमध्ये एचआईभी र हेपाटाइटिस सीको औषधि निम्न आयका भएका मुलुकका जनताको पहुँचमा पुग्न जरुरी रहेको एएचएफ नेपालका कार्यक्रम प्रबन्धक दिव्यराज जोशीले बताए ।
‘जीवनरक्षक औषधिहरूको मूल्य अत्यधिक निर्धारण गरिएको तथा यसले निम्न आय भएका देशहरूमा केही औषधिहरू दर्ता गर्न इन्कार गरेका कारण एएचएफले औषधि कम्पनीको उक्त रवैयाको विरोध गरेको हो,’ प्रबन्धक जोशीले भने ।
विश्वकै शीर्ष १५ औषधि कम्पनीमध्येमा पर्ने गिलियड औषधि कम्पनीले २७ अर्ब डलरभन्दा बढी मुनाफा आर्जन गरिसकेको छ । सन् २०२१ मा मात्रै यस कम्पनीले आफ्नो सीईओलाई १९ मिलियन डलरभन्दा बढी भुक्तानी दिएको थियो ।
अत्यधिक प्रभावकारी हेपाटाइटिस सी औषधिको मूल्य प्रति चक्की १,००० अमेरिकी डलर पर्छ र १२ हप्ताको उपचारको खुद्रा मूल्य अमेरिकामा ९०,००० डलरभन्दा बढी छ।
प्रबन्धक जोशीका अनुसार एएचएफले उक्त औषधि कम्पनीको व्यवहारको विरोधमा विश्वव्यापी रूपमा नै विभिन्न प्रकारका विरोधका कार्यक्रम गरिरहेको छ ।
