काठमाडौंमा निषेधाज्ञा असार ७ सम्म लम्ब्याइयो, अब यी काम गर्न पाइने
चाणक्य पोष्ट
प्रकाशित : 4:33 pm, आइतबार, जेठ ३०, २०७८

काठमाडौं । काठमाडौं उपत्यकामा जारी निषेधाज्ञा थप १ साता लम्ब्याइएको छ । आज बसेको काठमाडौं, भक्तपुर र ललितपुरका प्रमुख जिल्ला अधिकारीको संयुक्त बैठकले जारी निषेधाज्ञा असार ७ गतेसम्म थप गर्ने निर्णय गरेको हो ।

 

उपत्यकामा जारी निषेधाज्ञा यसअघि थपिएको म्याद भोलि राति १२ बजेसम्म लम्ब्याइएको थियो । निषेधाज्ञाको समयवधि थपिएको यो पाँचौं पटक हो । काठमाडौं उपत्यकामा गत वैशाख १६ गतेदेखि निषेधाज्ञा जारी छ ।

 

अबको निषेधाज्ञा अहिलेकोभन्दा केही खुकुलो बनाइएको छ । अब खाद्यान्न, किराना पसल, डिपार्टमेन्ट स्टोर, तरकारी, फलफूल, दूध डेरी पुस्तक पसल  बिहान ११ बजेसम्म खोल्न पाइने छ । यसअघि विहान ९ बजेसम्म मात्र खोल्न पाइन्थ्यो ।

 

यस्तै, होटेल रेष्टुरेष्टहरुले टेकअवे सेवा गर्न पाउने भएक छन् भने हार्डवेयर पसल अपरान्ह ४ बजेपछि खोल्न दिइने निर्णय भएको छ ।

 

कृषिको समय भएकाले त्यससम्बन्धी कार्यलाई पनि सहजीकरण गरिएको छ । बिउ, मल लगायत कृषि सामग्री ढुवानी गर्न दिइने भएको छ ।

 

यस्तै, हप्ताको दुई दिन आइतबार र बिहीबार सहकारी संस्था खोल्न दिने भएको हो।बैंक तथा वित्तीय संस्था, सरकारी कार्यालय लगायत अन्य क्षेत्रमा काम गर्ने कर्मचारीको निजी सवारी-साधनको आवतजावतमा समेत सहजीकरण बनाइने जनाइएको छ ।

 

यस्तै, अब मास्क लगाएर हिँडडुल गर्न पाइने दिइने भएको छ ।