काठमाडौं । सरकारले कोरोना रोकथाम तथा नियन्त्रणका लागू गरेको निषेधाज्ञा आदेश उल्लंघन गर्ने माथि कडा कारबाही गर्ने भएको छ । निषेधाज्ञा पालना नगर्ने माथि १ वर्षसम्म ५ लाखसम्म जरिवाना वा दुवै सजाय गर्ने भएको हो ।
सरकारले ‘कोभिड १९ संकट व्यवस्थापन सम्बन्धमा व्यवस्था गर्न बनेको अध्यादेश’ जारी गर्दै यस्तो व्यवस्था गरेको हो । कोरोना महामारी रोकथामका लागि प्रशासनबाट जारी आदेश उल्लंघन गरेमा ५ लाख रुपैयाँसम्म जरिवाना र १ वर्षसम्म कैद वा दुवै सजाय गर्नसक्ने अध्यादेशमार्फत प्रावधान गरिएको हो ।
संक्रामक रोग ऐनअनुसार १०० रुपैयाँ जरिवाना वा एक महिना कैद वा दुवै सजाय, काममा अवरोध पुर्याए ६ महिनासम्म कैद वा ६०० रुपैयाँ जरिवाना वा दुवै सजाय हुने व्यवस्था भएपनि अध्यादेश मार्फत झन् कडा बनाएको हो ।यस्तै, आदेश अटेर गरे ६ महिनासम्म कैद वा ३ लाख रुपैयाँ जरिवाना वा दुवै सजाय गर्न सक्ने प्रावधान पछिल्लो अध्यादेशमा समेटिएको छ ।
अध्यादेशले आदेशविपरीत काम गरे संस्था वा व्यवसायलाई ६ महिना बन्द गर्न सक्ने अधिकार पनि प्रमुख जिल्ला अधिकारीलाई दिइएको छ ।
निषेधाज्ञामा अनुमतिबिना सवारी चलाए २ पाङ्ग्रेलाई २ हजार र ४ पाङ्ग्रेलाई ५ हजार जरिवाना, मास्क नलगाए पटकै पिच्छे १०० र निषेधाज्ञा उल्लंघन गरेर हिँडडुल गरे प्रत्येक पटक २०० रुपैयाँ जरिवानाको व्यवस्था गरिएको छ ।
यसैबीच, गृह मन्त्रालयले निषेधाज्ञालाई थप कडाइ गर्न ७७ जिल्ला प्रशासन कार्यालयलाई निर्देशन दिएको छ । शुक्रबार दोस्रोपटक संसद् विघटन भएसँगै राजनीतिक दलहरुले प्रतिवाद गर्ने घोषणा गरेसँगै त्यसलाई मध्येनजर गर्दै गृहले कडाइका साथ निषेधाज्ञा पालना गराउन निर्देशन दिएको हो ।
