कोरोना विरुद्धको विश्वमै पहिलो खोप बनाएको दाबी गर्ने रसियाले खोप उत्पादन कार्यलाई तीव्रता दिने भएको छ ।
भ्याक्सिनको तेस्रो चरणको परीक्षण बाँकी रहे पनि रसियाले सो अगावै खोप उत्पादन सुरु गरेको हो । रसियाको स्वास्थ्य मन्त्रालयका अनुसार खोपको तेस्रो चरणको परीक्षण गरेपछि मासिक ५० लाख डोज खोप उत्पादन गर्ने जनाइएको छ ।
मस्कोको गामेलाय इन्स्टीच्यूटले बनाएको यस भ्याक्सिन डिसेम्बर वा जनवरीसम्ममा प्रत्येक महिना ५० लाख वटा बन्ने जनाइएको छ।
रसियाले तेस्रो चरणमा २ हजारभन्दा बढी मानिसमा खोप परीक्षण गर्ने तयारी गरिरहेको छ । रसियाले उत्पादन सुरु गरेको खोप अबको १ महिनाभित्र बजारमा आउने बताइएको छ ।
गत साता रसियाली राष्ट्रपति भ्लादिमीर पुटिनले विश्वभर कोभिड-१९ विरुद्ध पहिलो भ्याक्सिन आफ्नो देशले बनाएको घोषणा गरेका थिए।
रसियाले भ्याक्सिनको नाम स्पुतनिक-५ राखेको छ। स्पुतनिक अन्तरिक्षमा जाने पहिलो उपग्रह थियो जसलाई रसियाले लञ्च गरेको थियो।
यद्यपि रसियाले बनाएको उक्त खोपलाई विश्व स्वास्थ्य संगठनसहित विश्वका अन्य देशको अध्ययन संस्थाले मान्यता भने दिएका छैनन् ।
एजेन्सी
