काठमाडौं । सरकारले कोरोना महामारीका कारण विदेशमा अलपत्र परेका ३ हजारभन्दा बढी नेपालीको उद्धार गरेको छ ।
जेठ २३ देखि विभिन्न देशमा विविध कारणवश अलपत्र परेका नागरिकको उद्धार शुरु गरेको सरकारले अहिलेसम्म ३ हजार १०८ जनालाई स्वदेश ल्याएको छ ।
गैरआवासीय नेपाली संघका राष्ट्रिय समिति तथा नेपाल सरकारका कूटनीतिक नियोगको संयुक्त पहलमा गत तीनहप्तामा ती नागरिकलाई उद्धार गरेको हो ।
मलेसियाबाट ११८, युएई ३१७ जना, कुवेतबाट ८९८ जना नेपालीहरू स्वदेश फर्किएका छन्। यस्तै, जापानबाट १३ जना, अफगानिस्तानबाट १८ जना र हङकङबाट ७ जना, म्यानमारबाट २६ जना र अस्ट्रेलियाबाट ११ जनाको उद्धार गरिएको छ।
यस्तै बंगलादेशबाट २५८ जना, ओमानबाट ३१३ जना, माल्दिभ्सबाट ३०५ जना, कम्बोडियोबाट र सिंगापुरबाट १४६ जना र थाइल्यान्डबाट २४८ जना नेपाल फर्किएको एनआरएनएद्वारा जारी विज्ञप्तिमा उल्लेख छ।
यसैगरी कतारबाट ४४ जना, श्रीलंकाबाट ५ जना, साउदी अरबबाट १ सय ५३ जना नेपाली फर्किएका छन् भने दक्षिण कोरियाबाट २ सय २८ जना नेपाल फर्किएका छन्। त्यस्तै आईतबार साउदीको रियादबाट २४७ जना नेपाली काठमाडौ आइपुगेका छन् ।
नेपाल एअरलाइन्सको उडानबाट एक नाबालकसहित २४७ जना नेपालीहरु आज बिहान स्वदेश आइपुगेका हुन् । ६ महिनादेखि नेपाली राजदूतावासको सेल्टरमा रहेका १२ जना महिला र बाँकी पुरुष आज स्वदेश फर्किएका हुन् ।
सरकारले उद्धार गरेको भने पनि यसरी आउनेमा अधिकांश आफ्नै खर्चमा चार्टर्ड उडानमार्फत आएका छन् भने केही रोजगारदाता कम्पनीले नै टिकट काटेर पठाएका छन् ।
