काठमाडौं । सरकारले लकडाउन १२ दिनका लागि थप गरेको छ । शनिबार बसेको मन्त्रिपरिषद्को बैठकले जेठ ३२ गतेसम्म लकडाउन लम्ब्याउने निर्णय गरेको हो ।
यसअघि थपिएको लकडाउनको समयवधि मंगलबार सकिँदै छ । विश्वभर महामारीको रुपमा फैलिएको कोरोना रोकथाम तथा नियन्त्रणका लागि सरकारले लकडाउनको समयवधि थपेको यो सातौं पटक हो ।
पछिल्लो समय काठमाडौं उपत्यकासहित देशमा कोरोना सङ्क्रमित बढिरहेको र परीक्षणको दायरा अझ बढाउनुपर्ने भएकाले लकडाउनको अवधि लम्ब्याइएको बताइएको छ ।
सरकारले पहिलो पटक चैत ११ देखि १८ गतेसम्म लकडाउन घोषणा गरेको थियो । त्यस्तै, दोस्रो पटकमा त्यसलाई लम्ब्याउँदै चैत २५ गतेसम्म पुर्याइएको थियो ।
तेस्रो चरणमा बैशाख ३ गतेसम्म घोषण गरेको थियो भने चौथो चरणमा वैशाख १५ गतेसम्म पुर्याइएको थियो । त्यस्तै, पाचौं पटक वैशाख २५ गतेदेखि जेठ ५ गतेसम्म लकडाउन लम्ब्याएको थियो भने छैटौं पटकमा जेठ २० गतेसम्म थपिएको थियो ।
हालसम्म नेपालमा १४०८ जनामा कोरोना भाइरसको संक्रमण पुष्टि भइसकेको छ भने ६ जनाको मृत्यु भएको छ । संक्रमितमध्ये २१९ जना उपचारपछि निको भइसकेका छन् भने अन्य देशका विभिन्न अस्पतालमा उपचाररत छन् ।
पछिल्लो समय देशका भिन्नाभिन्नै ठाउँमा कोरोना देखिने क्रम तीव्र रुपले बढेको छ ।
