काठमाडौं । काठमाडौं महानगरपालिकाले गरेको आरडिटि (र्यापिड डाइग्नोस्टिक टेस्ट) टेष्टमा सबै विदेशबाट आएकाहरुको रिपोर्ट नेगेटिभ पाइएको छ । महानगपालिकाले ३२ वटै वडामा २०७६ फागुन १८ गतेपछि विदेशबाट फर्किएर काठमाडौं महानगर क्षेत्रमा बसोबास गरिरहेका १ हजार १६ जना व्यक्तिहरुमा परीक्षणमा गरेको हो ।
महानगरले बैशाख ३ गतेदेखि १३ गतेसम्म आरडिटी परिक्षण गरेको थियो । सो अवधिभर परीक्षण गरिएका सबैको रिपोर्ट नेगेटिभ आएको सहरी स्वास्थ्य महाशाखा प्रमुख नरेन्द्रबिलास बज्राचार्यले जानकारी दिए ।
महानगरले बिदेशबाट फर्कने व्यक्तिमा कोरोना भाइरस (कोभिड १९) संक्रमण हुन सक्ने सम्भावना सहित परीक्षण गरेको थियो । आरडिटि परीक्षणका लागि वडाले आफ्नो क्षेत्रबाट नामावली संकलन गरेको थियो । केही वडामा पहिलो पटकको परीक्षणपछि फेरि नाम प्राप्त भएकोले थप परीक्षणको प्रबन्ध गरिएको बज्राचार्यले भने ।
कागेश्वरी मनोहरास्थित सनसिटी अपार्टमेन्टमा बसोबास गर्ने ३ जनामा कोरोना संक्रमण देखिएपछि महानगरले प्रत्येक वडाबाट परिक्षण सुरु गरेको हो । सो अपार्टमेन्टमा बस्ने काठमाडौं महानगरपालिका वडा ५ का स्थायी बासिन्दा २०७६ चैत ९ गते बच्चाहरुको जन्म दर्ताका लागि वडा कार्यालय आएका थिए । बैशाख १ गते उनीहरुमा कोरोना भाइरस संक्रमण पोजेटिभ देखिएपछि बैशाख ३ गते वडा ५ का जनप्रतिनिधि र कर्मचारी गरी ३९ जनाको आरडिटी परीक्षण गरिएको थियो ।
परीक्षणमा सबैभन्दा धेरै वडा ३१ का १ सय १९ जना विदेशबाट फर्किएका सहभागी भएका थिए । वडा नम्बर ३२ बाट १ सय १५ जना र वडा ४ बाट ५१ जना सहभागी भएका थिए । वडा नम्बर २० बाट भने परीक्षणका लागि कसैको नाम प्राप्त नभएको जनाइएको छ ।
वडा नम्बर ४ का ५१ जनाको आरडिटी परीक्षण गरिएको थियो । बैशाख ५ गते वडा नम्बर ९ का ३ जना, वडा १० का १३ जना, वडा ३१ का १ सय १९ जना र वडा ३२ का १ सय १३ जना मीनभवनस्थित ट्रलीबस परिसरमा परीक्षण गरिएको थियो । त्यसैदिन वडा १५ का ४८ जना सामुदायिक स्वास्थ्य सेवा परिषद् डल्लूमा परीक्षण गरिएको थियो । सो दिन २ सय ९६ जनाको परीक्षण भएको थियो ।
बैशाख ६ गते वडा १८ का १६ जना, १९ का ३ जना, २१ का ५ जना, २२ का १३ जना, २३ का ५ जना, २४ का ११ जना, २५ का १२ जना, २६ को १ जना र २७ का १२ जना गरी ७८ जनाको परीक्षण गरिएको थियो ।
७ गते वडा १६ का ८० जना, १७ का ८ जना, १५ का थप २ जना, २६ का ३२ जनासहित वडा १२, १३, १४ गरी १ सय ७६ जनाको परीक्षण सम्पन्न गरेको थियो । बैशाख ८ गते वडा ६, ७, ८, ९, १७ का व्यक्तिहरुमा परीक्षण गरिएको थियो ।
बैशाख १२ गते वडा नम्बर १, २, ३, १५, १७ र २६ का व्यक्तिका लागि परीक्षण गरिएको थियो । यसैगरी बैशाख १३ गते वडा ११, २८, २९, ३०, १२, १६ र ३२ मा परीक्षण गरिएको थियो ।
