पछिल्ला दिनहरुमा कोरोना भाइरसको फैलावटमा थोरै कमी आउन थालेको देखिएको छ । महामारीको केन्द्र रहेका इटली र स्पेनमा भाइरस थोरै सुस्ताउन थालेको जस्तो देखिन थालेको छ भने अमेरिकामा अझै केही हप्ता लाग्ने होकी जस्तो देखिन थालेको छ ।
मार्च महिनाको तेस्रो सातादेखि कोरोना भाइरसको फैलावट तीव्र गतिमा फैलन थालेको हो । त्यो भन्दा अगाडि मुख्य रुपमा चीनमा केन्द्रित भएको भाइरस मार्चको तेस्रो साता देखि युरोपलाई केन्द्र बनाउन थालेको थियो ।
विश्वव्यापी रुपमा भेटिइरहेका संक्रमितहरुको संख्या हेर्दा पछिल्ला ३ दिन यता संक्रमितहरुको संख्यामा थोरै गिरावट आउन थालेको देखिन्छ ।
अप्रित ३ तारिखका दिन हालसम्मै सर्वाधिक १ लाख १ हजारजना संक्रमित भेटिएका थिए, विश्वभर । त्यसपछिको दिनमा ८१ हजारको हाराहारीमा संक्रमित भेटिएका थिए भने अप्रिल ५ तारिखका दिन ७१ हजार संक्रमित भेटिएका थिए । अप्रिल ६ तारिखका दिन भने थोरै बढेर ७३ हजारजना संक्रमित भेटिएका थिए ।
अबको २ हप्तासम्ममा अमेरिकामा पनि भाइरसको फैलावटमा थोरै कमी आउने जानकारहरु बताउन थालेका छन् । साथै, उनीहरुको अबको केन्द्र दक्षिण एसिया र विशेष गरी भारत बन्नेसक्ने पनि औंल्याएका छन् ।
भारतको कुरा गर्दा केही दिनयता संक्रमितहरुको संख्या तीव्र गतिमा बढ्न थालेको छ । हाल भारतमा ५ हजारको हाराहारीमा संक्रमितहरु भेटिन थालेका छन् । तर, जानकारहरु भारतमा संक्रमितहरुको संख्या त्यो भन्दा कैयौं गुणा धेरै हुनसक्ने अनुमान गर्छन् ।
१ अर्ब ३० करोड भन्दा बढी जनसंख्या रहेको भारतमा हालसम्म १ लाख ४० हजार हाराहारीको मात्र जाँच हुन सकेको छ । यो भनेको प्रति १० लाख जनसंख्यामा १०० हाराहारी हो । विकसित देशहरुको प्रति १० लाख जनसंख्यामा १५ देखि २० हजारसम्म जाँच गरेका छन् ।
भारतको सन्दर्भमा अर्को सचेत हुनुपर्ने कुरा के छ भने त्यहाँमा सुकुम्बासी वस्तीहरुमा अत्यन्तै ठूलो जनघनत्व रहेको छ । उदाहरणको लागि मुम्बईको धाराभी भनिने सुकुम्बासी वस्तीमा करिब २.५ वर्ग किलोमिटरको क्षेत्रमा ५ लाख भन्दा बढी मानिसहरुको बसोबास छ । र, दुःखको कुरा के छ भने त्यस्ता सुकुम्बासी वस्तीहरुमा पनि संक्रमणहरु भटिन थालेका छन् ।
नेपालको सन्दर्भमा पनि हजारौं मानिसहरु भारतबाट विशेष गरी सुदूरपश्चिममा आएका कारण त्यहाँ उल्लेख्य मात्रामा संक्रमितहरु हुन सक्ने बताइन थालेको छ । तर, नेपालमा पनि भारतमा झैं जाँच उल्लेख्य संख्यामा हुन सकेको छैन ।
