काठमाडौं । डा. सुन्दरमणि दिक्षितले टेकु अस्पतालले कोरोना परीक्षणमा चरम लापरबाही गरेको आरोप लगाएका छन् । अस्पतालमा कोरोना संक्रमण टेस्ट गर्ने स्पेसल किट्स नभएको र रहेका किट्सहरु समेत भीआईपीका लागि मात्र भएको उनले दाबी गरे ।
मंगलबार (आज) संवाद चौतारीले गरेको छलफल कार्यक्रममा उनले अस्पतालमा आइसोलेशन बेडसमेत पर्याप्त नभएको बताए ।
देशको एक मात्र सरुवा रोग परीक्षण गर्ने टेकु अस्पतालको अवस्था भरोसा गर्न लायक नभएको उनले बताए ।
कोरोनाको आशंकामा टेकु पठाइएका बिरामीको परीक्षण नगरी फिर्ता पठाइएको उनले आरोप लगाए । कोरोनाको परीक्षणमा सरकारले उचित व्यवस्था नगर्दा नेपालमा कोरोना छ÷छैन समेत ठम्याउन नसकिएको उनको भनाइ ।
‘कोरोनाको परीक्षणका लागि आएका मानिसलाई परीक्षण नै नगरी फर्ता पठाइएका छन्, यस्तो अवस्थामा नेपालमा कोरोना छैन भनेर कसरी ढुक्क हुन सकिन्छ,’ डा. दिक्षितले भने ।
उनले आम जनतालाई नेपालमा कोरोना भित्रिएको छैन भनेर ढुक्क नहुन आग्रह गरे । ज्वरो आएकालाई मात्र नभई ज्वरो आएर निको भएकालाई समेत भाइरस हुनसक्ने उनले बताए ।
उनले आफ्नै क्लिनिकमा आएको बिरामीलाई कोरोना परीक्षणको लागि टेकु पठाउँदा अस्पतालले परीक्षण नै नगरी फिर्ता पठाएको बताए । ‘टेकु अस्पताले चेक जाँचका लागि पठाइएका बिरामीलाई ज्वरो आएको १५/२० दिन भइसकेछ, घर गएर आराम गर्नुस भनेर फिर्ता पठाउने गरेको छ,’ उनले भने ।
विश्व स्वास्थ्य संगठनले कोरोनाको बारेमा सम्पूर्ण नागरिकलाई जानकारी दिन र स्वास्थ्यको राम्रो परीक्षण गर्न भनिए तापनि टेकु अस्पताले बिरामीको स्वास्थ्यमा लापरबाही गरेको उनको आरोप छ ।
टेकु अस्पतालका डाक्टरले बिरामी परीक्षण गर्न हिच्किचाएको उनले दाबी गरे । अस्पतालले बिरामीलाई अन्य अस्पतालमा परीक्षण गरेर रिपोर्ट ल्याउन भनेको समेत जानकारी दिए ।
